Lian Ingles sai hanesan lian trabalho iha mundu tomak inklui Timor-Leste, tanba ne’e lideransa iha nasaun foun ida ne’e, liu-liu membru parlamentu nasional sira, importante hatene koalia lian Ingles, nune’e bele halo negosiasaun diak liu tan bainhira sai membru ASEAN.
“Tanba kuandu ita haruka fali tradutor mak tradus fali mai ita ladun diak, e la ruma la to’o ita nia objetivu ne’ebe ita hakarak, entaun diak liu mak tenke hatene rasik lian ingles,” hateten Deputada Fernanda Mesquita Borges, (01/06), bainhira halo dialogu nasional ho sosiedade sivil, iha Correios, Kintal Bo’ot, Dili.
Tuir Deputada Borges, ida ne’e mos parte ida atu poupa osan estadu nian hodi selu ba tradutor sira.
Entretantu kandidatu feto husi Partidu Demokrata Republika de Timor (PDRT), Ludovina Fontes Leite dehan lian Ingles importante atu hatene, nune’e bainhira halo vizita estadu nian ba iha nasaun sira seluk, sir abele koalia direitamente ho ema estranjeiru.
“Hau hanoin lingua Ingles ne’e importante tebes no nudar membru parlamentu (MP) tenke domina tanba bainhira ita ba vizita estado iha nasaun vizino sira hanesan Australia, Amerika ita bele koalia ho sira diak liu tan, se ita lahatene ita sei la aprezenta buat ne’ebe ita atu aprezenta,” dehan Kandidatu feto partido PDRT, Leite.
Nia hatutan, lingua Ingles bele fo vantajen diak ba membru parlamentu sira ne’ebe atu ba tur iha parlamentu hodi bele halo diskursu ruma ho lian Ingles, e nia rasik sei esforsu atu domina lian trabalhu ne’e ho diak.
Iha parte seluk Prezidente Partidu PARENTIL, Flaviano Pereira Lopes hateten, bele aprende lian Ingles tanba ne’e importante, maibe Timor-Leste rasik tenke defende lian official signifika katak se mak mai iha Timor-Leste nia tenke aprende lian Tetun.
“Ita halo funu no harii nasaun atu defende kultura, lian official, bandeira, povu no estadu tanba ne’e ita bele estuda ema nian lian, maibe labele haluhan dezenvolve ita nia lian rasik, ezemplu eis prezidente Indonezia Soeharto, nia halo diskursu iha nasaun seluk ho lian Bahasa,” dehan Prezidente Partidu PARENTIL ne’e.
Nia rekonese katak, lian Ingles hanesan lian trabalhu, tanba ne’e ba futuru presiza loke barak liu tan kursu ba joven sira iha nivel nasional no distrital, nune’e jerasaun tuir mai bele domina lian internasional ne’e.
