Ho la marka prezensa Deputadu sira iha Parlamentu Nasional, liu-liu iha plenaria halo parlamentu sai vakum liu, e tuir lolos komisaun permanente sira mak tenke ativu, hodi hala’o atividade parlamentu nian.
“Komisaun permanente mak hala’o atividade parlamentu nian, liu-liu iha tempu emerjensia bainhira atu foti desizaun ruma,” hateten Deputadu Estanislao da Silva, (04/06), iha Uma Fukun, Dili.
Maske nune’e tuir nia, Meja Parlamentu rasik seidauk fo sai kona ba komisaun permanente sira nia servisu ate a data.
“Komisaun permanente ema la barak ida, ema mais ou menus la to’o 30, husi partidu hotu-hotu nia reprezentante,”Deputadu nee tenik.
Entertantu Deputadu Mateus de Jesus katak, tuir lolos iha loron Segunda no Tersa iha plenaria, maibe Deputadu sira la marka prezensa no korum la priense.
“Hau sempre mai hela iha ne’e ema sempre entrevista hau fo hela hanoin e ohin tan hau mai komesa ohin dader kedas maibe ami nain lima oan deit mak iha ne’e,”dehan Deputadu de Jesus.
Tuir nia, iha rejimentu parlamentu nian fo dalan atu halo politika, maibe la’os atu abandona plenaria bainhira tama ba tempu kampanha.
Iha sorin seluk Deputadu Pedro da Costa afirma, funsionamentu Parlamentu ninian to’o 31 de Julhu, maibe agora atividade parlamentu nian la la’o.
“Iha razoens barak, razaun ida mak Prezidenti Parlamentu rasik agora tun ona halo kampanha e iha Vise nain rua maibe la simu delegasaun, tanba ne’e kompetensia Prezidenti ,” Deputadu da Costa tenik.
