“Ami entrega ona ba SEPI iha 2011, e sira tenke fo sai ona rezultadu ba publiku para ema hotu hatene atu nune’e ita bele halo rekomendasaun ba governu foun atu estabelese politika ida klaru hodi garantia implementasaun,” eziji Diretor Pontu Fokal Jeneru (PKJ) ME, Afonso Soares, (23/05), iha nia knar fatin Vila Verde, Dili.
Peskiza ne’e rasik hala’o iha tinan kotuk, iha Distritu Ainaro, Aileu no Distritu Ermera, ne’ebe maioria feto foinsa’e sira la remata sira nia estudu tanba gravida no razaun sira seluk tan.
Kona ba feto hira mak la konsege akaba sira nia estudu iha Distritu tolu ne’e, tuir Diretor Soares, nia labele fo numeru detailhu, tanba ne’e kompetensia SEPI nian.
Nia hatutan, husi peskiza ne’ebe sira halo iha distritu tolu ne’e, feto barak mak tama eskola tarde, tanba ne’e governu tenke estabelese politika ida, liu-liu halo sosializasaun ba sira kona ba idade hira mak sir abele tama eskola, nune’e ba future bele minimiza numeru analfabetu feto.
Iha oportunidade hanesan Membru PFJ, Cesaltina da Conceição Isac katak, nia parte kontinua halo follow up ba rezultadu peskiza ne’e ba iha SEPI, maibe to’o agora laiha rezultadu positive.
“Ami sempre iha enkontru ruma ami husu bainhira mak bele publika sai rezultado final maibe resposta ne’ebe ami hetan mak hein deit,” dehan membru PFJ, Isac.
Iha parte seluk Xefe Departamentu Peskiza SEPI, Hermenio Xavier hateten, rezultadu peskiza ne’e agora iha hela prosesu editing no tradusaun ba lian Inglesh, nune’e ema sira husi liur mos bele hatene kona ba asuntu ne’e.
“Ita presiza hein prosesu finalize atu halo aprezentasaun no seminariu ida ba partisipantes sira, atu hatene diak liu tan kona ba peskiza ida ne’e tanba ne’e ita seidauk bele publika sai,” Xefe Xavier esplika.
Tuir planu, rezultadu ne’e sei fo sai ba publiku iha fulan Junhu, depende ba prosesu editing ba lia fuan ne’ebe seidauk klaru no tradusaun ba lian ingles nune’e mos sei halo hanesan buku ida hafoin realize seminario konaba rezultado ne’e atu ema hotu bele hatene nune’e implementasaun bele la’o ho susesu.
