Komisaun Nasional Luta Hasoru HIV/SIDA (KNLHS) divulga informasaun ba Polisia Nasional Timor-Leste (PNTL) no Forsa Defeza Timor-Leste (FDTL) ne’ebe hala’o knar iha fronteira, kona ba moras HIV/SIDA, ne’ebe oras ne’e buras dadadun iha nasaun foun ida ne’e.
“Ita hatene Kabupaten Atambua, fatin ne’ebe maka risku ba HIV/SIDA, ne’e duni presiza tebes atu hasa’e konesementu ba ita nia F-FDTL sira ne’ebe maka servisu iha area fronteira, atu nune’e sira bele hatene impactu husi moras ne’e, no bele hases an,” hateten Sekretariu Jeral KNLHS, Rui Carvalho, (24/05), bainhira halo workshop iha Sentru Juvenil Taibesi, Dili.
Tuir nia, Membru PNTL no F-FDTL sira, liu-liu sira ne’ebe servisu iha fronteira presiza hatene klean kona ba moras ne’e, tanba sira mak nudar xavi ba nasaun ida ne’e.
Iha oportunidade hanesan Coronel Joáo Miranda alias Aluk, ne’ebe partisipa iha workshop ne’e, dehan programa ne’e kapas tebes, tanba bele hasa’e konesementu membru sira husi instituisaun rua ne’e kona ba moras ne’e.
“Programa ne’e interesante e ita tenke fo importansia, atu ita bele asegura portantu intituisaun defeza no seguransa bele prevene sira nia an husi moras ida ne’e,” dehan Coronel Aluk.
Entertantu Xefe Saude PNTL, Abilio dos Reis Goncalves, katak Instituisaun PNTL sempre halo cek up ba nia membru sira ne’ebe halo servisu iha fronteira.
“Ami halo ona cek up ba HIV/SIDA hahu iha Kuartel Jeral Sub-distritu Suai, Maliana,no Oe-Cusse, maibe hau labele hatete sai rezultadu husi cek up ne’e, ema nain hira maka kona,” hateten Xefe Saude PNTL, Gonsalves.
