“Lei ne’e tama mai iha situasaun ida ne’ebe ke tama ona iha kampanha politika prezidensial, depois mai tan kampanha parlamentar ne’ebe ema hotu-hotu tun tiha ba baze, loro-loron mai la iha korum,” hateten Deputadu Agostu Tara, semana kotuk (22/05), iha Uma Fukun, Dili.
Tuir nia observasaun durante ne’e ba deputadu sira, katak Deputadu sira tama konforme tuir sira nia hakarak.
Nia hatutan, parlamentu ida ne’e lakonsege ona aprova lei ne’e, tanba mandatu besik remata ona no deputadu sira agora prepara aan tun ba halo kampanha ba eleisaun parlamentar nian.
“Hau la hatene lejislativu foun mai sei halo esforsu ida tan atu komisaun sira halo revizaun ba lei refere,” Deputadu Tara espera.
Entertantu Membru Komisaun C Parlamentar, deputadu Estanislao da Silva katak, lei anti korupsaun hein deit asesor komisaun C nian atu haruka mai iha Parlamentu atu aprova lei ne’e.
“Ami pratikamente diskuti hotu ona, iha pontu ida nebe ke iha dikusaun oituan tan, tanba dehan katak, pontu ne’e bele interpretasaun ruma,” Deputadu da Silva dehan.
Tuir nia, iha ratifikasasaun UN CAC nian, lei ne’e la iha problema tanba la kontra Konstituisaun Republika Demokratika Timor-Leste (RTDL).
Lei Anti Korupsaun ne’e sei tau matan ba ema ne’ebe servisu manan osan oituan, maibe riku derepenti deit, no tenke halo investigasaun ba nia.
Iha sorin seluk Deputadu Aderito Hugo dehan, Komisaun C halo ona relatoriu pareser oferese ona mai Parlamentu atu diskuti iha plenaria maibe korum mak lato’o.
“Lei ne’e importante tebe-tebes maibe hau diskorda opiniaun balun ne’ebe mak hateten katak,estabelese tiha komisaun depois mak lei tuir,” Deputadu Hugo katak.
“Evidensia mak hatudu dadauk iha kazu-kazu involve funsionariu publiku sira , ministru sira prosesu la’o nafatin iha ne’eba, maibe saida mak ita presiza tan para atu kompleta material lejislasaun sobre movimentu anti korupsaun ninian mak ita kompleta tan lei anti korupsaun,” Deputadu Hugo tenik.
Deputadu Hugo dehan, wainhira segunda lejislatura ida ne’e la konsege aprova lei ne’e bele kaduka husik ba terseira lejislatura mai mak adianta fali prosesu lei ne’e tomak.
