“Ita nia ema ne’ebe maka hari’I fatin ida ne’e, atu nune’e bele tau sasan memoria konaba ita nia istoria no dokumentus rezisténsia atu ita tomak bele hatene no wainhira ema estrangeiru mai visita rai ida ne’e sira bele hare,” dehan Primeiru Ministru, Kay Rala Xanana Gusmaõ, semana kotuk (20/05), iha serimonia inagurasaun Museum Rezistensia, iha Dili.
Antes ne’e sasan istoria no dokumentus resistensia tau deit iha mini museu iha Sekretariu Estadu Kultura nia fatin.
Tuir Xefe Governu, presiza harii museu ida , nune’e bele tau entidade especial ida, vokasiona ba prezerva memoria no patrimonio istoriku nasional no divulgasaun valór husi luta rezisténsia povu Timor-Leste, especialmente hamutuk ho foinsa’e sira.
Entretantu tuir Deputadu Joaquin Amaral, nudar nasaun foun tenke kontente tanba liu husi ida ne’e bele rekonstrui fali identidade Timor-Leste.
“Ita tenke kontenti, tanba ita rekonstrui fali ita nia identidade iha tempu pasadu, museum ne’e simboliza mos ita nia pasadu, museum ne’e rai sasan ne’ebe istoriku iha relasaun ho ita nia luta ba libertasaun, hanesan kilat, foto-foto durante iha ailaran no seluk tan,” dehan Deputadu Amaral.
Deputadu ne’e mos husu atu halo manutensaun ba museum ne’e, nune’e nafatin iha kondisaun ne’ebe diak no kapas.
Museu resistensia ne’e inagura husi Prezidente Portugal, Anibal Cavaco Silva akompanha husi Prezidente Taur Matan Ruak, Primeiru Ministru Xanana Gusmao no Eis Prezidente Jose Ramos Horta.
Iha eventu ne’e PM Gusmao mos fahe livrus kona ba resistensia luta Timor nian ba ukun rasik aan, ba iha ema estranjeiru no Timor oan sira.
