“Ami kontente no haksolok tebes tanba Ministra bele mai vizita ami, no se bele loron seluk Ministra sei bele mai vizita tan ami. No ami hein katak Ministériu Solidaridade Sosiál sei ajuda ami ba futuru, tanba ami maka naroman futuru nian ba nasaun ne’e. Se la’os ami se tan”, dehan vítima ida durante vizita hosi Ministra Alves ba Casa Vida foin lalais (31/05).
Ministra Alves nia vizita ho objetivu atu haree kondisaun no atividade ne’ebe Casa Vida halao to ohin loron.
Durante vizita ne’e mos, Ministra Alves asina Nota de Entendimentu entre MSS no Casa Vida no fó prenda ba labarik-vitima sira ne’ebe hetan mahon iha Uma Mahon Casa Vida laran.
Casa Vida loke iha Marsu 2008 hosi ema Brazil ida, Simone Barbosa Assis, Diretora Cara Vida agora daudaun, atu tau atensaun ba problema violensia hasoru labarik ho timan 3-18 ne’ebe maka sai vitima iha sira nia familia no komunidade laran.
Iha nia diskursu hafoin halao vizita ba organizasaun ida ne’e Ministra Alves fo parabens ba servisu ne’ebe Casa Vida halao hodi taun matan ba vitima sira.
“Ha’u fó parabens ba Casa Vida tanba bele haree labarik sira, tanba ne’e ha’u fó obrigada no parabens ba imi hotu ne’ebé tau matan ba sira,” hateten Ministra.
Refere ba vítima sira nia preokupasaun ne’ebe hato’o iha loron vizita, Ministra mos haktuir katak, ba kualkér instituisaun atu simu osan husi ministériu, nia tenke tuir kritérius balun hanesan iha fasilidades ne’ebé Casa Vida oferese hanesan iha espasu uma mahon, iha mós atividade bele hasa’e vitimas sira nia kapasidade.
“Atividade ne’ebé lori sira ba auto sufisiente, atu nune’e sira bele sai husi fatin ida ne’e, lakon sira-nia trauma, sira iha abilidade atu tama iha merkadu de traballu,” dehan tan Ministra Alves.
Entretantu Diretora Casa Vida Assis, iha nia diskursu hato’o liafuan balun kona-ba atividade organizasaun halao to ohin loron.
“Iha ne’e ami proteje labarik sira ne’ebé sai vítima iha sira-nia família no komunidade-nia le’et, no ami fó treinamentu ba sira, dedika sira eskola ka fó kapasitasaun sira seluk atu nune’e aban-bain-rua sira bele hetan kampu de traballu,” dehan Diretora Assis.
Diretora Assis mos hato’o nia agradesimentu ba Ministra tanba bele realiza vizita ba sira nia fatin no konhese no koalia ho vitimas no hatene klehan tan saida mak Casa Vida oferese ba vitima sira.
