“Ohin ita tau fatuk primeiru ba loja prizaun, idea ida ne’e mosu hodi fo apoiu diak liu tan ba apoiu formasaun treinu vokasional, atu nune’e ba maluk prizioneiru sira ne’ebe maka halo produtu local, bele tau iha mini loja ne’e hodi komunidade sira mai sosa,” hateten Cordenador Programa Peace Building/Community and Family Violence Prevention Program (PB/CFVP), Fernando Pires, Caritas Australia, semana kotuk (22/05), iha serimonia tau fatuk primeiru ba mini loja ne’e, iha Becora, Dili.
Tuir nia, projetu konstrusaun ba mini loja ne’e rasik sei remata iha Setembru tinan ne’e, nune’e bele entrega ba prizaun Becora.
“Kustu de halo mini loja ne’e iha 23 mil, dolares Amerikanu, ne’e gastu ba materiais no ba badain,” Cordenador Pires dehan.
Nia espera katak, rezultadu arte ne’ebe maka sira fa’an iha mini loja ne’e sei fo rendementu ba sira, no wainhira sai husi prizaun bele fo ba sira hodi bele ajuda sira nia familia.
Entertantu Vise Ministru Justisa, Ivo Valenti ne’ebe maka marka mos prezensa iha serimonia ne’e, senti orgullu ho suporta ne’ebe maka Caritas Australia fo ba prizioneiru sira.
“Hau hakarak agredese ba NGO Caritas Australia, durante tinan hitu ona sira fo apoiu no suporta aktividades iha dirasaun prizaun ninian, la’os de’it iha Becora maibe iha Gleno, ne’e hatudu komitmentu no apoiu internasionais, liu-liu agradese mos ba Governu Australiano,” Vise Ministru Valenti, agradese.
Nia esperansa katak, apoiu ne’e bele kontinua nafatin iha Governu foun oin mai, tanba ajudus sira hanesan ne’e importante, atu bele hadia mentalidade prizioneiru sira.
