Negosiante fa’an roupa Obralan (OB) iha merkadu Comoro to’o agora seidauk muda ba merkadu foun Manleu, tanba governu la prepara fatin ba sira.
“Ami to’o tiha iha ne’eba loron hira ne’e, hahu husi dia 01 Maiu to’o agora ne’e haruka ami ba laran maibe fatin iha laran mos la iha,ne’ebe ami atu lori ami nia roupa ba uma deit ona,” hateten Negosiante OB, Tereza Pereira, semana kotuk (15/05), iha merkadu Comoro, Dili.
Negosiante Pereira lamenta tebes, tanba estadu muda sira obrigatoriu deit maibe la prepara kondisaun ba sira iha merkadufoun ne’e.
Entertantu tuir Xefe Suku Fatuhada, Marcelino Soares katak, Comoro la’os ona merkadu, tanba ne’e hakarak ka lakohi negosinate sira tenke muda ba merkadu foun.
“Fa’an obralan sira ne’e ami fo oportunidade ba sira muda ba kotuk fali,wainhira prepara obralan nia fatin hotu tiha mak sira foin muda, la’os muda sira arbiru deit,” hateten lideransa komunitariu ne’e.
Iha sorin seluk Administrador Distritu Dili, Gaspar Soares dehan, ora ne’e dadaun konstrusaun la’o hela hodi prepara sira nia fatin, no bainhira remata tenke muda hotu.
“Kapasidade merkadu foun ne’e mak limitadu, labele tampung ema hotu kedas, fo sira durante semana rua ka tolu iha kotuk ne’e para hein konstrusaun remata,” Administrador Soares tenik.
Entretantu prosesu muda negosiante sira ba merkadu foun la’o ho diak sein violensia no hetan seguransa maximu husi Polisia Nasional Timor-Leste (PNTL).
