Maske Governu muda ona negosiante sira iha merkadu Comoro ba iha merkadu Manleuana maibe iha merkadu foun ne’e laiha bee moos no haris fatin.
“Hau mos la simu ita nia maun alin sira fa’an fali iha estrada klaran, maibe hau la simu liu ba estadu ho governu ida ne’e mak la kria kondisaun,” lamenta Deputadu Inacio Moreira, semana kotuk (14/05), iha Uma Fukun, Dili.
Tuir Deputadu Moreira, kondisaun merkadu Manleuana la diferente ho merkadu Taibesi ne’ebe Governu halo la ho saneamentu, e agora fatin ba animal sira.
“Bee dalan la iha, eletrisidade mos nato’on deit e ema sira ne’e mos dadersan ba fa’an, lokraik fila, agora hau nia perguntas, sasan sira ne’ebe la sosa hotu sira tenke lori fali ba uma ga husik rai hela deit hanesan ne’e,” Deputadu Moreira preokupa.
Tanba ne’e nia husu ba Governu tenke halo planu ne’ebe diak no kria kondisaun, atu nune’e negosiante sira bele fa’an sira nia sasan ho diak.
Entertantu Administrador Distritu Dili,Gaspar Soares dehan, Merkadu foun Manleuana iha fasilidade kompletu hanesan bee, eletrisidade no mos haris fatin.
“Ita bo’ot sira bele ba cek iha ne’eba bee no eletrisidade, so ke fatin mak seidauk to’o, kapasidade merkadu foun limitadu tanba ne’e mak labele tampung ema hotu kedas,” hatan Administrador Soares.
Iha parte seluk Diretor Nasional Peskiza e Dezenvolvementu iha Ministeriu Turismu Komersiu Industria (MTCI), Jacinto Paijo katak, merkadu foun ne’e uza deit bee sanyo iha fatin hat kedas, hodi responde negosiante sira nia nesesidade.
“Haris fatin iha hotu ona, maibe fatin sira ne’e depende ba sira nia tipu negosiu,” dehan Diretor Paijo.
