Universidade Nasional Timor Lorosa’e (UNTL) desde ukun aan to’o agora dosente ne’ebe hanorin iha universidade ne’e sei minimu, liu-liu dosente feto, maske nune’e parte UNTL nafatin loke oportunidade ba feto sira ne’ebe ho titlu mastradu atu bele kandidata hodi hanorin iha fatin ne’e.
“Ami sempre fo oportunidade ba feto sira bainhira iha rekrutamentu ruma, liu-liu feto mastradu sira ne’ebe hakarak sai dosente iha universidade ida ne’e, maibe depende ba ema ida-idak nia hakarak,” hateten Pro-Reitora ba Asuntus Koperasaun iha UNTL, Ligia Tomas Correia, semana kotuk (10/05) iha Kampus UNTL, Dili.
Tuir Pro-Reitora Correia, kompara entre dosente feto ho dosente mane seidauk iha balansu. “Dosente feto ne’ebe tur iha estrutura UNTL nian, iha retoria iha feto nain rua, ida mak hau, no ida madre Esmeralda, pro-reitora asuntu konsolamentu no servisu sosiais nian, no Diretora Departementu Fisika no Departementu Enfermagen madre ida no dosente iha balun, seidauk iha barak,” hateten Pro-Reitora ne’e.
Entretantu Diretora Departementu Fisika Terezinha A.Soares dehan, sai mestra ka mestri hanesan profisaun ida, tanba ne’e ema ne’ebe sai dosente iha UNTL tenke iha vontade rasik.
“La’os dehan feto kapasitadu mak laiha ka menus, feto mastradu barak, maibe depende ema ida-idak nia hakarak,” hateten Diretora Soares.
Tuir nia, numeru dosente feto menus tanba istoria iha pasadu (tempu Indonezia nian) ne’ebe feto ladun iha vontade atu kontinua ka aprende siensia iha universidade.
“Ezemplu hanesan atu aprende Fisika, Matematika, Kimika no Biolojia, ema barak mak ladun iha interese ou tauk tanba materia hirak ne’e formula barak liu, la hanesan aprende politika no social,” Diretora ne’e afirma.
Diretora ne’e espera katak, ba future numeru dosente feto bele aumenta, nune’e bele iha balansu entre feto no mane.
