Nudar Profesional Saude, Ministru Saude (MS) Nelson Martins pronto atu fo apoiu ba iha Ministru foun ne’ebe sei lidera setor saude ba tinan lima oin mai, hodi responde ejizensia povu Timor-leste iha area saude nian.
“Hau hanoin orgulhu tebes bele kompleta hau nia mandatu durante tinan lima, tanba hau ema ida ne’ebe laiha esperiensia tur iha governasaun, hau pontu fila fali ba hau nia profisaun hanesan mediku, dosente no peskizador ida, kontinua nafatin fo kontribuisaun ba dezenvolvimentu setor saúde,” dehan Ministru Martins, semana kotuk (15/04) bainhira selebra loron mundial ba saúde iha salaun Institutu Nasional Saúde (INS) Comoro Dili.
Ministru Martins husu ba ministru foun ne’ebe mai, atu kompleta no hatutan buat ne’ebe seidauk diak, tanba durante governu anterior to’o mai governu Aliansa Maioria Parlamentar (AMP) halo ona buat balun hanesan programa SISCA,kontinua la’o ba oin tanba Timor iha planu estratejiku 20 anos.
Maske sira nia mandatu remata, maibe Ministru Martins husu ba eis governasaun sira iha area saude nian, atu sai hanesan airin bo’ot ida, hodi dezenvolve no hametin liu tan setor saude iha future.
Ministru Martins mos sente triste oituan tanba durante tinan lima nia laran, iha enfermeirus balun iha Sub-distritu lahatena uza komputador. “Maibe sira nia servisu nudar pesoal saude diak tebes,” Ministru katak.
Iha parte seluk Komunidade Rosantina da Costa dehan, durante mandatu Governu AMP nian, setor saúde hatudu duni progresu ne’ebe diak, liu-liu komunidade sira iha area remotas sente duni asistensia pesoal saúde liu husi programa SISCA ne’ebe hala’o fulan ida dala ida.
“Hau hanoin nudar nasaun foun, iha setor saúde iha duni progresu ne’ebe diak maske ema barak mak la rekonhese tanba agora dadaun ita nia inan sira iha area rurais bele asesu ona ba fasilidade saúde liu husi post health sira iha suku maske la kompletu,” dehan komunidade da Costa.
Nia espera katak iha governu foun mai, bele hili ema ne’ebe iha esperiensia diak liu iha setor importante rua,setor saúde no edukasaun, tanba dezenvolvimentu nasaun sei la la’o bainhira la alkansa seitor rua ne’e.
