Tuir Xefe Departamentu Registu Dezenvolvimentu Professional Saúde, Duarte Marcal de Araujo katak, governu sei la hasa’e osan subsidiu ba estudante medicina, enfermagen, parteira ne’ebe agora dadaun halao estudu iha Universidade Nasional Timor Lorosa’e (UNTL), tanba laiha orientasaun husi Parlamentu Nasional atu aumenta sira nia subsidiu.
“Uluk ba estudantes medicina sira iha Cuba kada fulan US$ 100, tanba do’ok husi familia maibe agora tu’un US$ 75 kada fulan hanesan ho sira ne’ebe estuda iha Universidade Nasional Timor Loronsa’e (UNTL) no sira ne’ebe hala’o estajio iha distritus,” dehan Xefe Marcal, semana kotuk (12/04) iha nia knar fatin Kaikoli, Dili.
Kona ba osan subsidiu ne’ebe sempre tarde, nia dehan tanba relatoriu ne’ebe estudate sira submete ba ministerio tarde nomos iha prosesu ne’ebe naruk.
“Subsidio sira ne’e governu fo, atu ajuda estudante sira hodi hola sabaun ou nesesidade baziku e osan ne’e husi orsamentu capital dezenvolvimentu, e kona ba alojamentu ne’e governu mak selu,” Xefe de Araujo esplika.
Iha parte seluk Ministru Saúde (MS) Nelson Martins hateten, osan subsidio tarde tanba nia prosesu avaliasaun ba dadus difisil oituan, han tempu ne’ebe naruk, e mos tanba la’os ministerio mak kaer osan direitamente maibe iha administrasaun Ministerio Edukasaun mak kaer.
“Hau husu atu aselera nafatin labele trava no rekursu umanu ministerio saúde tenke servisu maka’as, kordena nafatin hodi bele fasilita subsidio estudante sira nian bele sai ho tempu ne’ebe determina,” dehan Ministru Martins.
