Atu prevene moras HIV/SIDA labele da’e t barak liu tan ba ema seluk liu husi relasaun sexual, Klinika Mari’e Stope’s Internasional Timor-Leste (MSITL) prepara ona kontrasepsaun modernu kondom ba feto sira.
“Ami iha kondom ba feto maibe feto barak mak la kohi uza , se feto balun hakarak hetan bele mai vizita Klinika MSITL no ekipa ne’ebe hala’o knar iha Distritu walu nuune’e bele halo prevensaun moras ne’ebe hada’et liu husi relasaun sexual,” dehan Diretora Mary Larkin, semana kotuk (01/03) iha selebrasaun aniversario MISTL Vila Verde Dili.
Relasiona ho kestaun ne’e, Xefi Klinika Polisia Nasional Timor –Leste (PNTL), Inspektor Abilio de Araujo Goncalves husu ba MSITL atu halo sosializasaun ba iha komunidade sira, liu-liu joventude feto sira, nune’e sira bele hatene no kompriende, tanba durante ne’e ema hatene mak kondom ne’e ba mane deit maibe realidade ba feto mos iha.
“Hau tuir kursu dala barak ona e hau hanoin kondom ba feto ne’e folin karun tanba ladun iha, so kondom ba mane ne’e barak e agora kondom ba feto mos iha ona, importante mak halo sosializasaun,” sujere Inspektor Goncalves.
Nia hatutan, servisu MSITL positive tebes ba komunidade sira e alende komunidade iha capital Dili, sira mos hala’o programa haleu Distritu walu ona.
“Maibe iha perguntas bo’ot ida ba hau, Mari’e Stope’s ne’e eziste iha Timor-Leste permanente ou temporariu deit, se permanente espera katak nafatin halo koperasaun ho Ministeriu Saúde atu fo asistensia ba inan feto sira iha area rurais,” Nia esperansa.
Hatan ba kestaun ne’e, Marketing Koordinador MSITL, Mariano da Silva katak sira halo ona sosializasaun ba iha komunidade liu-liu ba joventude feto no mane sira ne’ebe iha distritu walu ne’ebe sira tama ona.
“Ne’e hanesan Instrumentu ne’ebe ema atu uza halo prevensaun maibe atu uza ne’e laiha obrigatorio entau ami nia kliente lakohi uza ami mos la obriga, ami so esplika ba sira kona ba impaktu husi uza kondom no la uza kondom,” Kordenador da Silva dehan.
Tuir nia, dala barak sira la hodi ba iha distritu tanba tuir sira nia hare katak ema barak mak laiha interese atu uza kontrasepsaun modern ne’e tanba ne’e mak sira tau deit iha klinika “se mak hakarak uza bele vizita klinika no ekipa sira sei atende sira,” nia katak.
