“Ita foin estabelese postu rejistu ba Bulletin Identidade iha distritu hat mak Distritu Oe-Cusse, Bobonaro, Suai no Distritu Dili i distritu seluk seidauk estabelese tanba sistema atendimentu ne’e presiza eletrisidade no teknolojia (INTERNET) tanba uza sistema online ne’eduni se distritu ne’ebe laiha elektrisidade no internet ne’e difisil atu estabelese,” hateten Diretor Rejistu Sivil Distritu Dili, (DNRC) Victor da Costa Neto, foin lalais (10/02) iha nia knar fatin Kaikoli Dili.
Diretor Neto hatutan, BI importante tebes ba sidadaun ida nudar dokumentus identidade tanba ne’e sidadaun hotu presiza iha BI.
Nia afirma, total komunidade ne’ebe hetan ona BI, tuir dadus estatistika iha tinan kotuk nian hamutuk ema nain 3.200, enkuantu Janeiru 2012 hamutuk ema nain 410.
“Buletin Identidade ida ne’e importante tebes ba ita tanba ita nia ID mak ne’e liu husi bulletin ne’e mak identifika lolos ita Timor oan ka lae, kartaun eleitoral ne’e ita uza ba elisaun deit,” Neto afirma.
Alende Distritu hat ne’e, MJ mos iha planu atu estabelese postu rejistu BI nian iha Distritu seluk maibe depende ba orsamentu no rekursu umanu ne’ebe iha.
Nia informa, prosesu atendimentu ba BI iha loron Kuarta no Kinta feira no dokumentus ne’ebe uza atu hetan kartaun bulletin identidade mak sertidadun RDTL asli foto kopia tahan ida, kartaun eleitoral foto kopia tahan ida, deklarasaun husi xefe suku, no foto 3 x 4 clorido tahan ida. Enkuantu durasaun ba prosesu trata BI ne’e semana rua.
Iha lidun seluk Leovigildo Hornai, nudar sidadaun hateten BI importante tebes ba sidadania ida hanesan direitu fundamental ida no liu husi bulletin identidade ne’e mak sidadania sira bele hatene malu ne’eduni bulletin ne’e importante tebes ba sidadaun ida.
“Hau husu ba sidadaun hotu-hotu iha Timor-Leste bele hola parte atu trata kartaun Bulletin Identidade ne’e la’os sala ida tanba kartaun ne’e bele fasilita ita atu trata dokumentus saida deit liu –liu estudante sira ba futuru se o laiha BI governu sei la rekuinese o nudar sidadaun Timor Oan tanba o nia BI laiha,” Hornai dehan.*\
