Relasiona ho bee moos iha Jardin Colmera ne’ebe suli estraga, tuir Deputadu David Diaz Ximenes katak falta de atensaun husi governu liu husi Servisu Agua e Saneamentu (SAS) Distritu Dili.
“Bee ida iha jardin laran parese ita bo’ot sira tun sae hare. Bee iha ne’ebe suli arbiru deit mas la tau tanki ida para be ne’e bele aproveitavel,” kritika Deputadu Ximenes, semana kotuk (31/01) iha Parlamentu Nasional, Dili.
Tuir nia bee iha jardin ne’e suli arbiru tantu iha tempu bailoro no tempu udan maibe ministeriu kompetente la halo intervensaun.
Entertantu tuir membru Komisaun G Parlamentar Deputadu Mateus de Jesus katak, bee nebe suli arbiru ne’e tanba konsiensia husi komunidade sira mos la iha.
“Dala ruma ema ba fura be foin kesi fali, ba fura arbiru deit iha fati-fatin,” nia dehan.
Nia hatutan dala barak komunidade sira fura tiha bee husik tiha deit la tau torneira husik be suli arbiru deit fo impaktu fali ba ema sira nebe presiza los bee.
“Ita bele dehan ba diresaun servisu agua e saneamentu mak ladiak mas iha parte seluk mos komunidade rasik la iha konsiensia no la iha domin ida ba ema selu-seluk,” nia katak.
Tanba ne’e Deputado ne’e husu ba lider komunitaria sira bele fo atensaun ba komunidade sira labele estraga bee arbiru deit, atu nune’e komunidade sira seluk nebe presiza bee moos bele hetan.
Wainhira TDW koko konfirma asuntu ne’e ba iha Diresaun Nasional Agua Saneamentu maibe la konsege tanba Diretur laiha fatin atu koalia ho media.
