Atu hasa’e kapasidade no konhesimentu diak liu tan no bele fo asistensia ezaminasaun forensika ba vitima violasaun sexual, Uma Mahon Hakmatek (UMH) ne’ebe suporta hosi NGO Psychosocial Rekoperasaun no Dezenvolvementu Timor-Leste (PRADET) servisu hamutuk ho ajensia Nasoens Unidas UNFPA sei oferese treinamentu ba parteira sira.
“Durante ne’e ami halo ona treinamentu teoria. Agora daudaun ami halo kontinuasaun treinamentu pratika ba parteira sira husi ospital referral lima katak sira pratika direitamente ho vitima sira atu nune’e
sira bele komprende diak liu tan oinsa atu fo assistensia ezeminasaun forensika ba vitima violensia domestika no sexual. Nune’e mos oinsa atu uza ou hakerek draf protokolu atu bele uza iha prosesu tribunal,” hatete Kordenadora UMH PRADET, Luiza Marçal, semana kotuk (27/01) iha nia knar fatin Bidau Toko Baru Dili.
Kordenadora Marçal hatutan katak parteira sira ne’ebe tuir treinamentu ne’e mak hosi Ospital Referal Baucau, Maliana, Oe-Cusse, Suai, Maubise inklui mos hosi Ospital Nasional Guido Valadares iha Dili.
Kordenadora Marçal dehan mos katak Ospital Referral ida-idak, parteira nain tolu hetan konvite atu tuir formasaun ne’e maibe depende ba sira mai. Pareirtas ne’ebe tuir formasaun agora dadaun hala’o hela treinamentu pratika ho parteira husi Ospital Referral Maubise ho Maliana hamutuk na’in hat ho durasaun loron lima.
Partisipante sira ne’ebe tuir treinamentu ne’e to remata sei halo graduasaun iha dia 3 de April no sei hetan sertifikadu.
Treinamentu ne’e hetan suporta especial husi Ajensia Nasoens Unidas UNFPA ho montante orsamentu US$20,000.
Iha lidun seluk treinadora Dr. Margaret Gibbons hateten material ne’ebe sira fahe ba parteira sira mak hanesan oinsa atu fo assistensia ezaminasaun forensika ba vitima violensia domestika no sexual no halo pratika direitamente ho vitima sira; no oinsa halo esbosu protokolu hakerek kanek ne’ebe vitima hetan husi violensia hodi bele sai evidensia atu supporta vitima sira iha tribunal.
Alende treinamentu pratika ezaminasaun forensika iha mos programa seluk hanesan diskusaun ida entre Unidade Polisia ba ema Vuneravel (VPU), Forum Komunikasaun Feto Timor Lorosa’e (Fokupers), Victim Support Service (VSS), Mari’e Stopes Internasional ho partisipantes sira kona ba sistema referensia parseria nian no parseiru seluk tan kona ba prosesu iha tribunal no papel prokuradoria.
