Atu asegura Eleisaun Presidensial no Parlamentar 2012 no garante la’o ho diak Polisia Nasional Timor-Leste (PNTL) tenke kolabora hamutuk ho Forsa Defeza Timor-Leste (F-FDTL) hodi halo seguransa durentae period eleisaun rua ne’e maibe tenke bazeia ba lei ida.
“Hau hare papel F-FDTL ne’e mos importante tebes, bele fo kontribusaun iha Elisaun 2012 agora ne’e maibe ita seidauk iha lei ida ou regulamentu ida nune’e sira mos bele hola parte iha seguransa ba eleisaun nian. Karik mosu konflitu, F-FDTL bele tun ba back-up ita nia PNTL iha kotuk,” sujere Frei da Costa Gutteres, Koordinador Peskiza, Fundasaun Mahein (FM), semana kotuk (26/01), iha knar fatin, iha Balide, Dili.
Kordenador Guterres, Timor-Leste seidauk iha lei ida katak F-FDTL bele halo seguransa lisuk ho PNTL, tanba nia sujerea ba governu tenki kria lei ka regulamentu ruma ba ida ne’e.
“Se bele halo lei ka regulamentu ida, labele iha hein iha pertubasaun bo’ot maka F-FDTL tun mai halo atuasaun ou ajuda ita nia PNTL, tanba ita nia numeru polisia kiik oan liu. Iha ita nia lei mos hatete katak sistema siguransa ne’e sira bele halo integradu ne’e artinya [signifika] tenki hamutuk,” hateten tan Kordenador Guterres.
Entertantu Vise Presidente Komisaun B, Parlamento Nasional, Deputadu Paulo de Fatima Martins, hatete PNTL bele sukat rasik sira kbi’it katak bele ka la’e atu halo seguransa ba iha postu ou estasoens votus nian ne’ebe iha Timor laran tomak.
“Se sira labele kanaliza sira nia kekurangan [limitasoens] ne’e, Sekretariu Estadu Seguransa bele kordena ho Sekretariu Estadu Defeza nune’e bele halo seguransa ba Eleisaun Jeral tiinan ne’e,” hateten Deputado Martins.
Tuir kalendariu Eleisaun ne’ebe fo sai ona, Eleisaun Prezidensial sei hala’o iha 17 Marsu no eleisaun Parlamentar sei hala’o iha Junu laran 2012.
