Estudantes Eskola Ensino Baziku Uailalika, Sub-Distritu Uatolari, Distritu Viqueque, kontente tanba sira iha ona eskola ida iha sira nia bairo laran maibe sira seidauk bele kontente liu tanba eskola ne’ebe harii ho sala tolu ne’e falta saneamentu baziku hanesan bee mos no sintina ba estudante sira no professores.
“Ami sente kontente tebes tanba ami sei lalao dok tan ona. Ami mos sente triste tanba ami nia eskola ne’e hetan ona inagurasaun husi Ministerio da Edukasaun no UNICEF maibe fasilidade seidauk kompletu hanesan saneamentu baziku, bee mos no sentina, entau se bainhira ami tuir aprendizajen ami kabun moras ami tenke halai ba iha ailaran.
No fasilidade hanesan kadeira no meza mos sei menus,” dehan estudante Sonia Henrique, semana kotuk (19/1), iha Sub-Distritu Uatolari.
Iha lidun seluk, estudante Fransisco Filipe sente preokupa ho ponte ligasaun ba eskola ne’ebe kotu no seidauk hetan rehabilitasaun husi governu tanba ne’e obriga sira tenke hakur mota bainhira ba eskola.
“Ami sente triste tanba ami nia eskola iha ona maibe kondisaun estrada seidauk tanba ponte rua ne’ebe ligasaun ho ami nia eskola at entau ami tenke hakur mota bainhira ba eskola. Se udan bo’ot karik sira labele ba eskola tanba eskola iha mota sorin,” dehan Estudante Filipe.
Estudantes ne’e rekomenda ba Governu atu bele atende ponte rua ne’ebe ligasaun ho eskola filial Uailalika nune’e sira bele sente seguru bainhira ba eskola no la fo inpaktu ba sira bainhira tempu udan.
Amana Albino Pinto mos hato’o nia preokupasaun hanesan aman ida kona ba nia oan nia kondisaun nudar estudante.
“Eskola iha ona maibe ami presiza liu–liu mak estrada ligasaun ba eskola atu nune’e labarik bele lao ba eskola ne’e diak no ponte Diribu no Kaituka ne’ebe ho kondisaun aat labarik labele liu, bainhira udan bo’ot no sira tenke hakur mota foin ba eskola,” dehan Aman Pinto.
Nia hatutan katak sira identifika ona bee mos maibe elipamentu atu halo kanalizasaun mak laiha entau sira husu ba governu atu ajuda sira liu hosi ekipamentu hodi lao kanalizasaun bee mos ba eskola filial Uailalika.
