Kona ba keixa ida ne’e Deputada Tereza de Carvalho, hosi Komisaun F ne’ebe trata kona ba asuntu Saúde husu ba governu atu responde imediatamente tanba komunidade iha baze presiza doutor sira nia atendementu saude.
“Ami sei husu mos ba Ministerio Saúde atu hare asuntu ne’e urjente tanba agora tempu udan moras barak entau povu presiza doutor sira nia atendimentu,” Deputada de Carvalho dehan semana kotuk (9/1) iha Parlamentu Nasional, Dili.
Deputada de Carvalho hatutan tan katak Doutor Kubano sira mos tenke hatene katak sira iha akordu ida ho Governu Timor-Leste katak sira hakarak servi povu Timor-Leste to’o iha baze maibe se ho deit falta bee sira abandona servisu ne’e rekuinese laiha responsabilidade moral.
“Hau hanoin ne’e atitude ne’ebe ladun diak. Nudar Membru Parlamentu ami sei husu nafatin ba governu atu hare asuntu sira hanesan ne’e no saida mak falta ba ita nia Doutor Kubanu sira governu tenke responde imediata, nune’e doutor sira labele husik deit sira nia servisu tanba agora tempu udan povu barak hetan moras,” dehan Deputada de Carvalho.
Iha parte seluk Xefi SSU hateten tan katak komunidade iha sub-Distritu Uatocarbau prepara ona uma ba doutor kubanu sira ne’ebe atu fo atendimentu ba komunidade iha sira nia area maibe iha fulan hat ona Doutor Kubanu ne’ebe halao nia knar iha SSU abandona nia servisu atu fo atendementu ba pasiente sira iha centru ne’eba ho razaun falta bee mos.
“Ami presiza Doutor. Uma ba doutor mos ami prepara ona maibe tanba deit bee laiha ho ida ne’e Doutor Kubanu sira mai hare deit bee laiha entau sira fila no lakohi hela iha ami nia sentru saúde,” dehan Xefi SSU Mota, (3/1/12) iha knar fatin Uatocarbau.
Nia hatutan katak iha fulan hira kotuk liu ba ne’e Doutor Kubano sira sei fo asistensia ba pasiente iha sub-distritu Uatocarbau maibe agora fulan hat ona sira la ba ona fo atendimentu ba pasiente sira.
Tuir observasaun TDW iha fatin nota katak iha SSU laiha doutor ida atu fo asistensia ba pasiente sira, iha deit infermeiru no parteira nain rua.
Relasiona ho asuntu ne’e TDW koko atu konfirma ho Director Jeral Ministerio Saude, Agapito da Silva, maibe la iha fatin atu atende media.
