“Depois hau fo informasaun ba iha Pekuaria sira dehan katak, depois tinan foun mak sei ba atu halo vasinasaun,” hateten Deputadu Independenti Mateus de Jesus iha Plenaria PN, semana kotuk (9/1).
Deputado de Jesus hateten katak to’o agoras nia seidauk hetan informasaun husi Sefi Suku sira iha Distritu neba katak animal sei mate ka para ona.
“Komesa loron 26 Dezembru [2011] to’o iha loron 4 fulan Janeiru [2012] hau fila fali mai ne’e karau kuaze mate loro-loron, inklui mos hau nian karau mate kuaze lima,” haktuir tan Deputado de Jesus.
Tuir Deputado ne’e katak karau ne’e mate tanba moras saida nia seidauk hatene lolos tanba husi Pekuaria seidauk ba halo vasinasaun ba karau iha distritu neba.
“Dalaruma mininisteriu tau hela ema pesoal iha ne’eba mas karau nunka halo vasinasaun,” hateten nia tan.
Iha fatin hanesan membru Komisaun D, Deputado Adriano Joao, ne’ebe trata asuntu [saida?] katak hafoin debate Orsamentu Jeral do Estadu, Sekretariu Estadu Pekuaria iha Parlamentu halo audensia ho Komisaun D dehan katak vasinasaun ba animal sira kontinua lao nafatin hela.
“Maibe informasaun husi Deputadu Mateus foin dadauk katak iha distritu Bobonaro karau Mate barak. Entau kerdijer iha Natal no Tinan Foun sira la intensifika sira nia aktividade ida ne’e,” dehan Deputadu Joao.
Nia sublina tan katak, husi Komisaun D liu husi Deputadu ne’e nia sei rekomenda tan ba iha Ministeriu Agrikultura e Peskas ninia atu tau atensaun ba iha Diresaun Agrikultura iha distritu sira atu nune’e vasinasaun lao konntinua.
“Orsamentu ba vasinasaun ninian iha tinan–tinan preve, tanba ne’e mak la iha argumentu ida katak orsamentu la iha,” Deputado Joao aktuir tan.
TDW koko konfirma assuntu ne’e ho Sekretariu Estadu Agriukultura (Pekuaria), Valentino Varela, maibe la iha disponibilidade atu hasoru ho media.
