Maske halo ona inagurasaun ba Sentral Olio Pezadu iha Hera maibe realidade ahi sei kontinua lakan-mate no halo komunidade sira iha Distritu Baucau deskontente tanba kalan sira sunu deit lilin no lampu.
“Ami la dun kontente tanba maske [sentral] olio pezadu inagura ona maibe ahi sei kontinua lakan-mate e husi ita nia Governo sira hateten katak ahi sei lakan normal iha 2012 maibe ahi sei kontinua lakan-mate,” kritika komunidade Baucau, Augostu Martins, iha Baucau foin lalais ne’e.
Tuir nia governu labele promote uluk kuandu ikus mai la halo tuir.
“Ami nudar povu ki’ik husu ba Governo liu-liu Ministru ho nia funsionariu sira ne’ebe kompetente atu halo kontrola no servisu hamutuk ho kompania Xina sira atu bele hare didiak ba ita nia olio pezadu ne’ebe mak iha atu nune’e ahi bele lakan permanente no normal,” Komunidade Martins husu.
Entretantu Staf Eletrisidade de Timor-Leste (EDTL) Baucau, Jose Pires Pereira, hateten aliran olio pezadu ninian sensitivu tebes, akurat liu e la’os sira ne’ebe servisu iha olio pezadu ne’e mak halo maibe linha ne’e kona bosok deit buat ruma nia tenki mate.
“Realidade ami koko tiha ona mos labele ne’ebe ami desliga tiha deit tanba tahan deit kona mos ninia breker ida-ida taka a’an nune duni presiza atu tuir no hamos tiha linha ne’e mak fo informasaun ba sentral olio pezadu iha Dili loke tiha mak ahi bele lakan fali,” esplika Staff EDTL Pereira.
Hosi nia parte husu ba konsumidores sira ne’ebe uza enerjia husi sentral oliu pezadu atu kumprende.
“Kalan ruma ahi kuandu mate ami sempre kontaktu ho ema sira ne’ebe iha centru, laos husi EDTL mak desvia tiha maibe ami hakarak fornese ahi ba konsumedores sira para ami servisu pesoal sira mos bele hakmatek,” nia dehan.
