Maske Governu promete katak iha loron 28 Novembru ahi sei lakan 24 oras, iha fatin balun iha capital laran rasik hanesan parte Becora, Taibessi, no moss Metinaru ahi sei mate nafatin.
“AMP tomak, hotu-hotu koalia, sira rasik hatete katak 28 Novembru ne’e Dili laran tomak ahi sei lakan permanente 24 oras klaru, maibe horseik dia 28 ne’e ahi iha fatin balu mate, ahi iha fatin balu lakan. Ohin kalan iha dia 29 dader ne’e hau simu telefone husi ema barak husi populasaon Dili laran. Hau lahatene se, sira la tau naran, maibe sira dehan ahi mate iha Bidau, iha Taibesi, iha Becora ahi mate,” hateten Deputadu Anicetu Guterres, FRETILIN, semana kotuk (29/11), iha Parlamentu Nacional, Dili.
Deputado Guterres hakarak hatene lolos promesa katak ahi lakan permanente 24 oras iha 28 Novembru nia rezultado oinsa tamba povu balun seidauk komprende atu nune’e husi guvernu tenki esplika para labele kria duvidas iha povu nia let.
“Tinan-tinan orsamentu aumenta hela deit, lahatene problema iha nebe mais hau hanoin katak sira iha problema klasiku ida nebe kleur tia ona; problema jestaun, tamba ne’e maka iha distritu sira [jeradores] mos mate tamba problema mina laiha,” hateten tan Deputadu Guterres.
Iha parte seluk, Deputadu Fidal de Jesus ka Riak Leman hateten katak “Governu promete 28 Novembru ahi lakan, mas problema mak ida ne’e, ohin Vise President Vicente Guterres iha meza fo sai katak nia hetan informasaon husi Secretario Estadu Januario Pereira nebe toma konta ba ahi katak sira halo mate ahi balu tamba atu instala fiu sira atu to’o Manatutu.”
Tuir Leman, sempre akuntese falha no demora oituan iha parte tekniku nebe hateten ba povu tenki iha pasiensia atu hein ituan, tamba wainhira atu hetan rezultadu nebe diak ita tenki fiar malu no tenki pasensia.
“Agora ahi iha parte balu lakan no parte balu mate ne’e laos segnifikan katak ahi atu mate nune’e hela deit, mais sei halo instalasaun fiu balu atu nune’e ahi bele moris 24 oras iha teritoriu tomak.”
Deputadu leman apela ba Governu atu nafatin kaer metin liafuan katak 28 Novembru ahi sei lakan permanente.
Maibe tuir Domingos de Jesus residente parte Taibessi keixa katak nia ahi sei mate lakan nafatin. “Relidade iha ami nia parte Taibesi ahi sei mate hela, husi tuku 12 kalan to’o fali dadersan.
