“Maske la’os distritu hotu maibe iha fatin balun inan-aman sira kontente bainhira oan feto barak tanba oan feto bele fo osan barak ba sira, liu-liu kona-ba barlaki nian, tanba ne’e tuir ita nia tradisaun ne’ebe iha, oan feto sira la presiza eskola to’o nivel bo’ot e bainhira iha mane ida hakarak ona atu kaben ho sira nia oan feto entaun sira hasai tiha husi eskola,” hateten Agustinho Caet, semana kotuk (08/09) iha Vila Verde,Dili.
Tuir Caet, inan-aman balun la fo importansia ba sira nia oan feto atu eskola iha nivel ne’ebe bo’ot maibe sira konsidera liu husi barlaki oan feto nian, bele hadia sira nia ekonomia uma laran.
“Entaun inan-aman la’os ona dudu oan feto ba eskola maibe promove nia oan feto oinsa atu bele hola mane sedu,liu-liu inan-aman sira iha area rural,”nia observa.
Tanba ne’e, presiza halo sosializasaun ba inan-aman sira kona-ba importansia oan feto atu hetan asesu ba iha setor edukasaun.
“Hau hanoin ne’e kompetensia SEPI no Ministeriu Edukasaun, liu-liu Pontu Fokal Jeneru ministeriu nian atu hare kestaun ne’e,”nia sujere.
Entretantu tuir Maria Barreto, nudar dona da casa iha nia fatin Vila-verde katak inan-aman presiza muda sira nia hanoin tanba tempu agora lahanesan ho tempu uluk nian ne’ebe oan feto hein deit uma.
“Hau hanoin agora ema hotu feto-mane iha direitu hanesan atu hetan asesu ba edukasaun no iha kualker atividade, ne’ebe la’os ona tempu atu ita satan oan feto hela deit uma, hein para mane mai tama uma no kaben, ita hare feto barak mak ohin loron sai ministra, deputada, diretora no kaer pozisaun importante seluk,”nia hateten.
Tanba ne’e nia sei haruka nia oan feto sira eskola to’o nivel ne’ebe deit mak sira hakarak, tanba agora feto-mane iha direitu hanesan no ida nee garantia iha konstituisaun RDTL nian.
Iha parte seluk bainhira jornalista tenta konfirma asuntu ne’e ba iha Pontu Fokal Jeneru ME nian, Afonso Soares maibe lakosege tanba okupadu.
