Membru Parlamentu Nasional (PN), Joaquin Amaral husi bankada Fretilin hateten papel museu nian mak atu rai arkiva faktus historiku Timor-leste (TL) nian husi jerasaun ba jerasaun.
“Atu arkiva faktus historiku, faktus evidensia sira ne’ebe mak iha relasaun ho ita nia historia atu nune’e jerasaun foun mai bele sai testamunha,” hateten Deputadu Joaquin Amaral, semana kotuk iha PN.
Tuir nia ,iha museu nia laran iha dokumentus o- oin mak bele koalia kona-ba historia Timor ninian liu-liu istoria funu durante tinan 24 nia laran.
“Atu fo memoria ba ita nia future, ita labele komete fila-fali aktus violensia entre ita ho ita ,no oho malu entre povu ho povu, vizinu Indonezia iha trajedia umanidade no seluk tan,” nia katak.
Alende ne’e tuir Deputadu Francisco Branco, katak papel Museu ne’e mak relatoriu mai husi CAVR nian . ”Ida mak atu hari institute de memoria atu tau iha ne’eba, dokumentus hotu- hotu ne’ebe relasiona ho ita nia luta durante libertasaun 24 anos,”Branco afirma.
Deputadu husi bankada Fretilin ne’e hatutan, oras ne’e ddaaun Parlamentu iha ona projeitu lei ida kona-ba asuntu ne’e hodi halo debate iha plenaria.
“Lei ne’e atu hari institute memoria ida halo jestaun ba dokumentus bar-barak ne’ebe oras ne’e dadauk rai iha ne’eba presiza iha jestor ida,” Branco dehan.
Entretantu bainhira jornalista tenta konfirma asuntu ne’e ba iha Diretor CAVR maibe la konsege tanba la iha fatin.
