Xefe suku Hola Rua, distritu Manufahi halo kobransa illegal ba ferik-katuas sira ne’ebe simu osan idozus nian ho montante $40,00 kada ema ho razaun atu halo igreja.
“Hafoin ferik-katuas sira simu sira nia osan idozus nian, xefe suku haruka ema hein kedas iha odomatan,foti kedas $40,00 kada ema, ne’e illegal,” informa Deputada Maria Ilda da Conceicao, semana kotuk iha plenaria Parlamentu Nasional, hafoin simu kata husi reprezentante idozus sira iha Distritu Same semana kotuk.
Tuir nia, halo kobransa illegal ne’e laos bad ala uluk nian mabe dala tolu ona. Primeiru sira kobra $5,00, segundu $10,00 kada idozus e terseiru mak $40,00.
“Sira dehan atu halo igreja maibe laiha sura ruma husi parokia ne’ebe hatudu katak osan ne’e atu halo duni igreja,”nia dehan. Karta ne’e, nia parte haruka ona kopia ida-ida ba iha padre parokia distritu Same, pontu fokal idozus nian iha distritu Same, Administrador distritu no administrador sub-distritu Same inklui Komandante Polisia distritu Same.
Relasiona ho attitude xefe suku Hola Rua ne’e, Deputad ne’e husu ba meja atu husu ba ministeriu kompetente atu halo intervensaun kedas ba xefe suku ne’e. Entretantu Prezidente PN, Fernando Lasama de Araujo, promote katak nia parte sei halo kontaktu direita ba xefe suku ne’e.
“Hau sei halo intervensaun liu husi admistrador ne’eba, liu husi PNTL e hau sei buka telephone ba xefe suku ne’e, nune’e koalia diretamente ho nia, karik los labele tolera,”nia promote.
Tuir Lasama, atu halo igreja la’os kobra fali idozus nia osan, ne’e iha dalan seluk.
“Labele ba hanehan fali ferik-katuas sira, tenke fo fali sira nia osan sosa bua-malus nian ne’e lori fali fali ba hari tiha igreja,ne’e diak maibe ninia dalan ne’e ketak ida,” Lasama lamenta.
Entretantu bainhira jornalista tenta konfirma asuntu ne’e ba iha Ministra Solidariedade Sosial, maibe la konsege tanba okupadu
