Parlamentu Nasionál (PN) husu governu liu-liu Ministériu Justisa (MJ) tenke aselera lalais kriasaun sentru reabilitasaun ba labarik minoridade sira ne’ebé mak komete krime.
Deputada PN Angela Maria Corvelo de Andrade Sarmento dehan, labarik minoridade sira ne’ebé komete krime labele husik livre, maske sira la tama prizaun, maibé sira tenke tau iha fatin ida hodi eduka sira, no fatin ne’e mak sentru reabilitasaun komunitária.
“Governu liu-liu Ministériu Justisa (MJ) tenke aselera lalais kriasaun sentru reabilitasaun komunitaria ba minoridade,” nia hatete.
Nia haktuir, durante ne’e komesa akontese ona labarik sira komete krime ezemplu hanesan foin lalais hadau ema nia karteira iha dalan ikus rezulta vitima lakon vida, maibé atu prosesu labele, tanba lei projete labarik minoridade hahú husi idade 16 mai karaik.
“Ita tenke iha fatin própriu hodi tau labarik minoridade sira ne’ebé mak komete iha krime atu nune’e labele husik sira livre no sira tenke iha responsabilidade ba aktu ne’ebé sira halo,” Deputada Maria hatete.
Nia dehan, bainhira husik sira livre no fila-fali ba komunidade sira sei kontinua halo krime iha soiadade no sei kontinua halakon ema seluk nia vida aktu ida-ne’e labele tolera.
“Maske iha kódigu penal artigu 40 katak labarik minoridade 16 anos labele responsabiliza penalmente ba kazu ne’ebé sira halo no labele submete ba prizaun, tanba sira sei fó prioridade ba edukasaun, maibé ita tenke iha dalan selu ba sira-ne’e mak liuhusi sentru reabilitasaun,” nia hatete.
Nia dehan, governu tenke aselera lalais kriasaun sentru reabilitasaun komunitaria ne’e.
Entretantu, Ministru MJ Sergio Hornai dehan, sentru reabilitasaun juvenil ne’e fatin konstrusaun iha Tibar.
“Ita halo ona prosesu aprovizonamentu no administrativu sira la’o ho total montante $350.000 ba dezeñu nune’e mós seluk tékniku ba servisu nian,” nia hatete.
Nia dehan, dadaun ne’e ekipamentu no tékniku sira hahú prepara ona no husi Ajénsia Dezenvolvimentu Nasionál (ADN) mós ekipa koordena hotu ona no hein de’it atu implementa servisu.
“Buat hotu ita preparadu hotu mak iha halo servisu, tanba ne’e antes tinan ida-ne’e remata kriasaun finaliza ona no bele utiliza ona,” nia informa.Nia hatete, sentru ne’e finaliza ba menoridade sira ne’ebé mak komete iha krime sei lori ba tau iha ne’eba hodi eduka sira no sei la husik sira livre.
