Fundasaun Mahein (FM) husu governu tenke halo mós rekrutamentu ba ofisiál iha rekrutamentu membru foun Polícia Nacional Timor-Leste (PNTL) iha tinan 2025.
Diretór Ezekutivu FM, Nelson Belo hatete, rekursu umanus iha PNTL dadaun ne’e, seidauk koloka iha postu sira, tanba seidauk iha rekrutamentu ne’ebé natoon hodi bele responde ba problema menus pesoál iha postu adminstrativu no munisípiu sira.
Nia dehan, rekrutamentu ba membru PNTL foun Konsellu-Ministru foti ona desizaun, tanba ne’e FM sujere halo mós rekrutamentu ba ofisiál sira.
“Ita husu tenke halo mós rekrutamentu ba nível ofisiál, nune’e bele priense diretór nasionál, xefe departamentu iha instituisaun PNTL,” Diretór Ezekutivu FM Belo dehan iha knaar fatin, Díli.
Nia dehan, rekrutamentu ne’e ba membru hamutuk atus-lima (500), husi númeru ne’e tenke iha atus-rua (200) ba ofisiál nune’e bele koloka no lidera Komandante-Postu iha territóriu laran.
“Rekrutamentu ofisiál ne’e labele husi laran de’it, maibé fó mós oportunidade ba ita-nia joven sira ne’ebé mak ho nível edukasaun lisensiatura bele aplika mós,” nia hatete.
Nia dehan, ezemplu hanesan rekrutamentu ba ofisiál presiza atus-rua (200) ne’e bele fahe ba rua, na’in atus-ida (100) rekruta husi membru PNTL no na’in atus-ida (100) husi joven baibain.
Entretantu, Ministru ba Ministériu Interiór Francisco da Costa Guterres hatete, rekrutamentu membru foun ne’e ajente na’in atus-haat (400) no kouta ba ofisiál na’in atus-ida (100).
Nia dehan, objetivu rekruta ofisiál ne’e hodi bele substitui Komandante-Postu no Xefe Departamentu sira ne’ebé mak sei menus no balun ne’ebé idade ona.
“Ho ida-ne’e ita bele transforma estrutura instituisaun PNTL husi jerasaun ba jerasaun hodi bele lidera no halo mudansa,” nia informa.
“Ofisiál na’in atus-ida (100) ne’e lima-nulu (50) mai husi PNTL no 50 fó mós oportunidade ba joven baibain ne’ebé ho nível lisensiatura,” MI Guterres informa.
Alende ne’e nia dehan, kona-ba rekrutamentu dadaun ne’e komisaun prepara ona kritériu sira liu-liu fó oportunidade ba feto sira bele kompete.
Iha parte seluk Prezidente Komisaun B Trata Asuntu Defeza no Seguransa iha Parlamentu Nasionál Augusto Domingos (Deker) dehan, prosesu rekrutamentu ba membru polísia foun ne’e rigorozu tebes, ba PNTL hahú husi ajente to’o ofisiál.
“Ita husu tenke haree mós ba iha envolvimentu husi grupu arte marsiais no rituais sira,” nia hatete.
Alende ne’e iha prosesu rekrutamentu ne’e tenke transparánsia no labele familiarismu nune’e hodi fó oportunidade ba povu nia oan sira bele kompete.
