Primeiro-Ministro (PM) Kay Rala Xanana Gusmão, hateten governu kontinua suspende atividade artemarsiais iha territóriu Timor-Leste laran tomak, atu nune’e situasaun bele la’o hakmatek.
“Governu aprova resolusaun ida hodi prolonga suspensaun sirkulasaun atividade arte marsiais nian iha Díli nomós iha munisípiu, atu nune’e situasaun bele hakmatek,” Xefe Governu dehan iha Palácio Prezidente, Aitarak Laran, Díli.
PM Xanana dehan, iha eskola balun alunus no mestre sira lori fali arte marsiais ba iha eskola hodi baku malu fali, tanba ne’e Governu aprova resolusaun refere atu hala’o proibisaun ba arte marsiais.
PM salienta mós katak durante fulan neen (6) governu sei prolonga sirkulasaun atividade arte marsiais iha Díli nomós munisípiu hotu no governu sei loke kompetisaun ba iha arte marsiais sira ne’ebé maka eziste iha Timor-Leste hodi partisipa.
“Governu sei loke kompetisaun ba arte marsiais hotu bele tuir, nune’e sira bele hatudu sira-nia talentu iha públiku, labele oho malu no tuda malu iha kotuk de’it, maibé tenke hatudu talentu ba iha públiku hanesan karate no seluk tan kona-ba desportu nian hodi kompete iha rai liur fila mai hodi naran di’ak no seluk fali bele muda mentalidade hodi hapara problema sira-ne’e,” nia dehan.
Iha sorin seluk, Diretór Fundasaun Mahein (FM), Nelson Belo hatete sira apresia ba governu nia servisu haree liuba iha suspende atividade arte marsiais, maibé problema sira akontese iha rai lara ne’e la’ós maioria arte marsiais mak halo.
“Observasaun husi fundasaun mahein politika governu nian ba joven iha ona, maibé la implementa loloos, joven sira iha direitu tomak atu afilia ba iha grupu saida de’it durante grupu ne’e la viola konstituisaun, nia atividade tenke la’o nafatin se ita taka ne’e la hetan solusaun ne’ebé di’ak,” Nia dehan.
Diretór Belo hateten, suspende arte marsiais ne’e la iha solusaun, tanba momentu ne’e taka tiha ona depois loke fali, depois taka fali agora suspende tan fali, tan ne’e husu ba governu atu fortifika di’ak liuba investimentu humanu liuliu ba iha joven sira ba iha atividade vokasional sira ne’ebé presiza governu tenke kria.
Nia salienta, governu nia ideia atu suspende atividade arte marsais durante fulan (6) no sei loke kompetisaun ne’e di’ak, maibé importante liu mak governu tenke kria investimentu ida ne’ebé di’ak liuba humanu liuliu ba iha joven sira atu nune’e bele hamenus problema iha rai laran.
