Presidente Autoridade Munisipio Ermera, José Martinho dos Santos rekonese kareta funerario rua ne’ebe apoia husi Ministerio Solidaridade Sosial no Inkluzaun (MSSI) kondisaun avaria hela tanba ne’e obrigado familia kous mate isin sa’e transporte publiku.
Nia salienta semana kotuk bebe ida husi suku Fatubesi postu administrativu Hatulia B halo tratamentu iha sentru saúde Gleno, maibe lakonsege salva tanba kondisaun grave.
“Familia deside lori fila mate isin ba suku Fatubesi, no momentu ida ne’e sira kontaktu atu hetan apoia kargu funerario, maibe dadaun ne’e kareta rua iha munisipio avaria hotu entau ita labele apoia,” nia hateten via telefone.
Nia dehan sira konsegue kontaktu nasional atu apoia kareta funerario hodi transporta mate isin ne’e, maibe nasional kareta hotu sai halo transportasaun ba mate isin tanba ne’e familia la aguenta hein hodi kous mate isin sa’e transporte publiku ba postu, no kontinua lao ain ba hela fatin iha Fatubesi.
Nia hateten sira laiha planu atu sosa kareta funerario foun tanba tinan 2021, sira hetan orsamentu kapital minor ho montante $80,000 resin atu sosa kadeira meja ba funsionario sira hodi halo servisu.
Nia informa kareta funerario rua ne’e iha hela oficina atu halo manutensaun tanba atu sosa kareta foun ho kustu $45,000 to’o $50,000 ne’e orsamentu laiha.
Iha parte seluk, Diretor Nasional de Asistensia Sosial, iha Ministerio Solidaridade Sosial no Inkluzaun (MSSI), Lucas Tois hateten servisu asistensia ba kareta funerario desentraliza ona, signifika responsabilidade autoridade munisipio sira atu halo jestaun hodi fo asistensia ba komunidade iha munisipio laran.
Nia dehan sidadaun sira ne’ebe mai halo tratamentu iha hospital nasional la konsege salva bele kontaktu diresaun nasional asistensia sosial atu apoia transporta mate isin husi hospital ba to’o iha uma.
“Iha ne’e kareta funerario 10 atu responde ba ema ne’ebe mate iha Hospital Nasional Guido Valdares, liu-liu halo transportasaun mate isin husi hospital ba to’o iha hela fatin, maibe mate iha munisipio kareta husi nasional labele ba tanba munisipio sira iha kareta,” nia hateten.
Nia dehan tinan 2021, MSSI sosa taan kareta funerario lima hodi reforsa no apoia atendimentu iha nasional tanba kareta balun kondisaun grave tebes.
Nia hatutan munisipio sira ne’ebe kareta funerario kondisaun a’at tenke halo planu orsamentu hodi sosa kareta foun atu substitui.
