Centru Nasional Chega (CNC) halo palestra publika ba universidade sira iha Timor-Leste konaba oinsa mak hatur istoria Timor-Leste nian iha kontestu akademiku.
Tuir Diretor CNC, Hugo Fernandes hateten palestra ne’e partisipa husi Reitor, Decano, Dosente ho estudante sira.
“Ami halo palestra publika ne’e ba universidade sira para fahe ami nia kuinesementu liu-liu membro konsellu assesorial internasional Centru Chega nian, liu-liu konaba justisa transitoriu, arquivu e nomos istoria nian,” nia salienta.
Nia dehan palestra refere fahe husi peritus sira mai husi internasional sira, halo peskiza konaba istoria Timor-Leste nian, entau CHEGA konvida universidade sira mai partisipa para rona direitamentu husi peritus sira.
“Oinsa mak hatur ita nia istoria iha kontestu akademiku sentifiku. Oinsa mak ita halo avalisaun istoria ita nian. Oinsa mak ita intepreta istoria ita nian. Ida ne’e mak intensaun husi ita nia palestra publiku ne’e,” nia haktuir.
Nia mos dehan istoria Timor-Leste nian importante hodi hatur ba kontestu akademiku, para akademiku sira hodi hanorin fali ba jerasaun foun sira para istoria la bele lakon e jerasaun foun sira mos bele hatene istoria Nasaun nian.
Entretantu Estudante UNITAL, Agapito Fernandes hatete katak palestra publika ne’ebe organiza husi CNC ne’e diak tebes tanba koalia konaba istoria Nasaun Timor-Leste nian ho lian Tetum.
“Ne’ebe tuir hau nia hanoin palestra ne’e importante tebes ba Timoroan hotu. Timoroan presisa hateten nia istoria. Ba hau istoria ne’e laos ba nivel universidade deit maibe hahu nivel primaria mai to nivel universidade,” nia dehan.
Nia mos dehan istoria Timor ne’e importante tebes hodi hatama ba kurrikulu eskolar nian laos ba nivel akademiku deit, maibe ba mos nivel primaria, pre-sekundaria ho sekundaria, presisa Timoroan hotu hateten lalaok nasaun nian.
