Jogadores husi sub-21 ne’ebe ba tuir kompetisaun iha taxa Hassanal Bolkiah Trophy iha nasaun Brunei Darrussalam, Timor-Leste sai primeiru lugar iha kompetisaun ne’e no hetan piala rua ho osan BND 20.000.00.
Primeiru Ministru, Mari Bin Amude Alkatiri sente orgulho tanba pela primeira vez jogadores Timor oan sai primeiru lugar iha taxa Hassanal Bolkiah iha Brunei Darussalam.
“Hau hakarak hateten deit ba jogadores sira tenke preparado fizikamente, e hau husu ba jogadores sub- 21 kontinua imi nia treinu, tanba dala barak ita iha Timor-Leste istoria ba sub-18 ho sub-28 ita la’o diak” nia enkoraja, iha Palacio Governu, Dili.
Nia fo ezemplu, jogador konesidu mundial nain rua Cristiano Ronaldo ho Leonel Messi maske sira nia idade 30 resin ona maibe kontinua halo treinu hodi mantein forsa.
“Hau husu ba hau nia oan jogadores sira, labele baruk treinu tanba imi mak hakoak ona atividade ne’e, imi aprezenta Timor-Leste tomak iha Brunei Darussalam no kontinua hamorin ita nia rain iha nasaun hotu,” nia apela.
“Hau haree jogu ne’e iha video deit, dinamika teb-tebes, manan ho objetivu rasik no manan ho meritu rasik.”
Iha parte seluk Sekretario Estado Promosaun ba Alto Kompetisaun (SEPAK), Osorio Florindo rekonese katak foin primeira vez jogadores Timor-Leste hetan primeiru lugar iha taxa Hassanal Bolkiah ne’e, ida ne’e tanba sira nia esforsu dunik.
“Timor-Leste sai juara satu ba taxa Hassanal Bolkiah, ne’e istoria foun ne’ebe jogadores Timor-Leste hakerek ona iha area futebol Timor nian,” nia hateten.
Tanba ne’e, nia agradese ba familia sira ho ekipa tomak ne’ebe durante ne’e suporta ona, trata jogador sira ho diak.
“Uluk ita nia jogadores sub-19 hetan juara 3 deit e ohin sub-21 hetan juara satu,” nia orgulho.
Iha fatin seluk Joventude Abilio Araujo, sente kontente no orgullo tanba jogador Timor-Leste primeira vez sai primeiru lugar iha taxa ida ne’e.
“Jogadores Timor oan primeira vez foti taxa Hassanal Bolkiah nian iha Brunei Darussalam, ne’e hatudu ba mundo katak jogadores Timor oan bele foti taxa iha nasaun seluk,” nia hateten.
“Maibe, hau triste oituan tanba ita nia jogadores sai primeiro vensedor, mas ita nia governu la halo buat ruma,” nia dehan.
Nia preokupa, tanba ema husi nasaun seluk mak joga no manan, ema Timor hotu sai ba estrada halo pawai haleu Dili laran, maibe Timor oan mak manan, sira la halo buat ida.
