Prezidente Komisaun Konferensia Piscopal Timor –Leste Amo Bispo Dom Basilio do Nascimento, hateten sidadaun ne’ebe latuir votasaun, labele reklama nia direitu ba estado hodi tau matan ba sira.
Nia dehan, loron 12 fulan Maio ne’e sai hanesan dasi ida hodi tetu buat hotu, liu –liu tetu povu nia maturidade politika, tetu kapasidade lider sira nian, espesifiku atu haree liafuan dinamiku, ideias, estrategia no mensagen ne’ebe hato’o iha kampanha fo influensia duni ba povu no tetu mos povu nia interese partisipa iha politika nasaun nian, tanba persentajen ema la vota sei bo’ot tebes.
Nia hateten, sidadaun sira nia votu importante tebes atu hili forsa politika ka lider politiku ne’ebe sidadaun ida –ida fo fiar atu kaer ukun iha tinan lima mai.
“Sidadaun ka komunidade ne’ebe la vota depois labele reklama nia direitu ba estado atu tau matan ba nia, tanba nia lakontribui ba vida politika no estabilidade nasaun nian,” nia hateten iha diskursu ba jornada da paz ne’ebe le’e sai husi Amo Leandro Alves.
Nia hateten, demokrasia ne’e katak poder iha povu nia liman, povu mak manda no laiha ema ida mak diskute povu nia desizaun, tanba desizaun ne’ebe povu iha, todan liu.
Nia espera, forsa partidaria no lider politiku sira sei hatene hakru’uk ba povu nia desizaun. No forsa partidaria no lider politiku sira tenke iha maturidade politika ne’ebe bo’ot liu povu nian, tanba povu agora hatene ona moris iha demokrasia ho maturidade.
Iha parte seluk, sidadaun husi Postu Administrativu Atauro- Munisipio Dili, Joao Sarmento la tuir votasaun tanba tenke hein familia ne’ebe moras hela iha ospital.
“Hau labele husik hela hau nia familia ne’ebe iha kondisaun moras,” nia hateten
Nia hateten, hanesan sidadaun hakarak mos kontribui ba hadia futuru no estabilidade nasaun nian liu husi votus, maibe kondisaun mak la premite no lei la fo dalan ba sira atu vota iha Ospital Nasional Guido Valadares.
