Ministerio Edukasaun foin implementa programa koperativa iha Eskola Ensino Baziku Sentral (EBC) iha Hera, munisipiu Dili, maibe seidauk la’o diak.
Diretor Nasional Aksaun Sosial Eskolar Belchior Maria Barros hateten, programa koperativo ne’e seidauk la’o maximo tanba ministerio seidauk fo buat ida ba iha eskola.
Nia dehan,programa Koperativa ne’ebe la’o iha eskola Ensino Baziku Central Hera ne’e hetan ajuda husi Embaixada Tailandia fo osan $500.
“Eskola sira seluk seidauk e ami sei ba halo sosializasaun hodi haree kondisaun ne’ebe mak iha hodi halo planu ba oin ne’e oinsa,” nia dehan.
Tuir nia, programa koperativa ne’e la’os naran ba loke deit maibe tenke tau iha plano mak foin ba implementa tan iha eskola sira.
“Dadaun ne’e foin mak la’o iha eskola ensino baziku Hera, komesa iha tinan 2016 ne’e , hetan suporta orsamento husi Embaixada Tailandia $500 hodi halo programa koperativo ne’e,” nia informa.
Nia dehan, programa ne’e liga liu ba fa’an, sira fa’an sasan ne’ebe mak nesesidade ba labarik sira iha eskola, hanesan bee, rabisado, dosi no seluk tan.
“Ita hanorin labarik sira, oinsa halo kontabilidade ba sasan sira ne’e hotu, ida ne’e mak ita halo atu hafasil sira iha kontabilidade nian,” nia dehan.
Entretanto Sekretario Nasional rede edukasaun Timor-Leste Coalition for Education (TLCE), Jose Monteiro hateten ne’e programa ne’ebe diak maibe husu atu implementa mos iha eskola seluk.
“Tenke implementa ba eskola hotu, la’os ba eskola balun deit e seluk laiha,” nia hateten.
Nia dehan, koperativo ne’e diak ba estudante sira , oinsa sira hatene sura e liu husi programa ne’e sira bele hatene.
Iha sorin seluk komunidade e mos nudar inan-aman estudante Anabety Xisto, ne’e programa ne’ebe diak hodi sira bele iha konesementu iha kontabilidade nian.
“Ami pronto atu kolabora hamutuk ho professor sira, kontribui ba future oan sira nian ne’ebe diak,” nia hateten.
