Bazea ba monitorizasaun husi Provedoria Direitos Humanus no Justisa (PDHJ) ba atividades kampanha, nota katak labarik minoridade barak involve iha kampanha eleitoral ba elisaun antesipada 2018 nian.
Adjunto Provedor PDHJ nian Horacio de Almeida, hateten taxa partisipasaun labarik minoridade inklui husi eskola primaria no pre- sekundaria iha munisipio hotu iha atividade kampanha partidus politiku.
Nia hateten, lei bandu labarik minoridade sira partisipa iha kampanha tanba ida ne’e fo risku ba sira vida, liu-liu bainhira akontese buat ruma ba sira.
“Labarik sira labele tuir kampanha poliitka tanba dalaruma akontese buat ruma sira mak sai vitima uluk, dalaruma sira sae motor ba pawai, sira monu kanek ka tohar ruma sira labele ba eskola,” nia hateten, iha Dili.
Nia hateten, Timor-Leste seidauk iha lei protesaun ba labarik sira, sei prosesu hela maibe ita nia konstituisaun garante tiha ona e alende ne’e ita mos ratifika ona konvensaun Nasoes Unidas nian kona ba direito labarik nian, katak labarik sira iha direito atu eskola, hetan edukasaun, protesaun, halimar, no buat seluk tan.
“Ita prevene para ita nia oan sira labele hola parte iha kampanha partidos politiku tanba sira idade ki’ik tebes, seidauk to’o tempo atu hola parte iha kampanha, tanba iha ne’eba ita koalia kona ba propaganda politiku nian,” nia hateten.
Tanba ida ne’e, nia dehan bele fo influensia ne’ebe ladiak ba sira nia hanoin, sira nudar jerasaun foun tenke eduka ho diak.
Portantu, nia dehan ida ne’e la’os deit PDHJ nia responsabilidade maibe mos Komisaun Nasional ba Direitu Labarik, inklui inan-aman sira, hodi evita labarik minoridade labele partisipa atividades politiku nian.
Entretanto Tekniku Superior Komisaun Nasional Direito Labarik (KNDL), Teresa Freitas hateten iha sira nia observasaun durante kampanha identifika mos katak partidu bo’ot barak maka mobilize labarik minoridade sira tuir kampanha.
“Ami haree, katak sira involve labarik barak tebes iha kampanha, sa’tan kampanha ne’e hahu iha tempo ferias entaun sira mos ba maibe sira lahatene katak ida ne’e risku ba sira,” nia kestiona.
Nia dehan, inan- aman balun hatene tiha ona katak ida ne’e risku maibe sira lori labarik sira ba maibe balun mos ba rasik.
“Ami KNDL fo hatene tiha ona liu husi sensibilizasaun ami informa tiha ona ba inan-aman sira katak tempo kampanha labele lori labarik sira ba, tanba ida ne’e risku tebes ba labarik,” nia informa.
Nia dehan, tuir sira nia hare ne’e kada partido ne’ebe mai ne’e bele involve labarik 50 to’o 60, balun mos utiliza tan kaus partidos nian.
“Ida ne’e ami haree rasik ho matan, antes ne’e iha ona paktu unidade ne’ebe mak partido sira asina ona iha Comisaun Nasional Elisaun katak sei la involve labarik, maiba ikus mai iha terenu ami haree rasik ida nee,” nia dehan.
Entretanto Komunidade Abel da Costa hateten durante kampanha fulan ida ne’e involvimento husi labarik minoridade ne’e barak mak iha kareta leten, motor leten tun sai hakilar pawai ba mai.
“Tuir lolos ne’e, labarik ki’ik idade seidauk to’o atu vota ne’e labele ba tuir kampanha, se sira ba mak dezastre ruma akontese, se mak atu responsabiliza,” nia dehan.
