Diretor Nasional Aksaun Sosial Eskolar iha Ministeriu Edukasaun (ME), Belchior Maria Barros hateten atu garante kualidade nutrisaun ba menu merenda eskolar ba estudante sira, depende ba eskola ida-idak.
Tanba, nia dehan eskola balun do’ok husi merkado, entaun ida ne’e fila-fali ba planu eskola ida-idak, oinsa mak bele iha kualidade nutrisaun ba hahan merenda eskolar nian.
“Tanba iha menu ne’e, ami tau kada semana ida han na’an dalarua e ida ne’e difisil tebes ba eskola sira ne’ebe mak dok husi merkado,” nia hateten, iha Dili.
Nia dehan, programa merenda eskolar ne’e politika nasional ida, entaun hakarak ga lakohi programa ne’e tenke la’o iha eskola ensino baziku sira.
Kona ba asuntu ne’e, nia dehan Provedoria Direitus Humanus e Justisa (PDHJ) no Tribunal de Kontas rekomenda ona e ministeriu haree tiha ona.
“Ami haree ona ba kualidade hahan ne’ebe mak diak ba ita nia oan sira,” nia dehan.
Nia dehan, dadaun ne’e Ministeriu Edukasaun hamutuk ho Ministeriu da Saude halo desiminasaun ida kona ba grupu fornesedor, sira tenke iha konesementu diak hodi prepara hahan ba labarik sira.
“Hahan ne’e ita han la’os atu bosu deit, maibe tenke iha valor nutrisaun ne’ebe diak ba ita nia oan sira,” nia dehan.
Entretanto Diretor Edukasaun Munisipio Bobonaro, Alcino Britnes Joao hateten presiza duni atu hadia kualidade nutrisaun aihan ba menu merenda eskolar ba labarik sira.
“Ita serviso hamutuk ho Ministerio Saude, Agrikultura no Peskas hosi ita fornese menu ne’ebe diak, prienxe kriteria no mos bele fo nutrisaun ne’ebe mak diak ba ita nia estudante sira,” nia hateten via telefone.
Menu lor-loron ba merenda eskolar iha diferensia, nia dehan mak hanesan semana ida sira konsumu na’an dalarua, manu-tolun no mos modo tahan.
Iha sorin seluk komunidade Claudensio Pires hateten, fos ne’ebe mak Ministerio Edukasaun fo eskola sira programa merenda eskolar ne’e mos dalaruma fos ne’e fohuk tiha ona.
“Dalaruma labarik sira ba han iha eskola, fila mai uma sira dehan ohin ami han iha eskola ne’e etu dois los, entaun ida ne’e ita la’os atu hasa’e nutrisaun ba estudante sira,” nia kestiona.
Tanba ne’e, nia husu ba Ministerio Edukasaun tenke fo fos ne’ebe diak no kualidade, nune’e estudante sira han labele hetan moras.
