Komando Polisia Munisipio Dili kaptura ona suspeito nain 6 ne’ebe mak uza arma branka hodi ameasa ema seluk nia vida, foin lalais ne’e iha area postu administrativu Dom Aleixo nian.
Segundo Komandante Polisia Munisipiu Dili, Superientendente Asistente Euclides Belo hateten, suspeitu nain neen (6) ne’ebe detein hela ne’e deskunfia tanba involve iha kazu krime.
“Suspeito nain 6 ne’e uza sasan kroat halo asaltu ba vitima ida iha area Dom Aleixo nian iha loron tolu liu ba,” Komandante Belo informa, iha Dili.
“Ami kaptura no detein sira 72 oras, tuir prosedimento legal ne’ebe mak iha tanba sira kontra lei Numero 5/ 2017.”
Nia dehan, sira aprezenta ona ba Ministerio Publiku ba iha tribunal, halo ona primeiro interogatorio e agora hein deit desizaun.
“Mesmo desizaun seidauk sai maibehusi tribunal autoriza detido sira ne’e bele ba uma depois fila mai hodi simu desizaun husi tribunal,” nia dehan.
Kona ba evidensia ne’ebe mak polisia prende, nia dehan katana, tudik no kareta taxi ida no motor ,ne’ebe mak sira utilize iha momentu ne’eba, dadaun ne’e para hela iha Komando Munisipio Dili.
Nia husu, ba publiku sira hotu tenke kumpri lei ne’ebe mak iha, tanba seguransa ba estado ida ne’e iha instituisaun rua mak garante seguransa ba estadono ba komunidade hotu iha Timor.
Entretanto komunidade Emidio Alves hateten ema balun uza situasaun ne’e hodi halo sira nia interese privado hodi situasaun komplikado.
“Husu ba polisia, karik identifika se deit mak halo halo krimi ka involve iha problema, kaer hodi lori sira ba sulan iha komarka atu nune’e sira bele tauk,” nia husu.
Nia dehan, sira halo tiha krime mak polisia husik livre deit, ne’e sira la tauk sira kontinua halo situasaun ne’e komplikado nafatin.
“Ba sira ne’ebe mak hatene tiha ona lei maibe sira kontinua halo, ne’e signifika sira sadik duni, tanba ne’e husu ba polisia tenke halo operasaun ne’ebe mak rigorozu hodi kontrola ema sira ne’e,” nia dehan.
