Ministerio da Saude (MdS) ho parseiru agensia internasional no organizasaun non governmental sira dezenvolve instrumentu avaliasaun foun ba programa Saude Maternu Infantil.
Diretor Gabinete Garantia Kualidade Saude, Feliciano Pinto hateten instrumentu (formatu) ne’e ministerio prepara ona, maibe presiza konsulta ho parseiru sira atu uniformaliza instrumentu sira ne’e hodi melhora kualidade prestasaun servisu ba komunidade.
Nia dehan, instrumentu ida ne’e sei uza iha terenu hodi sukat progressu servisu programa saude maternu infantile ne’ebe implementa husi governu no parseiru sira iha baze.
“Instrumentu ida sei sai matadalan (padraun) atu avalia kualidade servisu saude maternu infantile iha Timor –Leste,” nia hateten bainhira halo konsultasaun publiku ho parseirus iha salaun Ministerio Saude Palacio da Sinzas Kaikoli, Dili.
Nia hateten, instrument anterior diak, maibe kleur ona presiza halo revizaun hodi adapta ho situasaun agora liu –liu kualidade ne’ebe Timor –Leste presiza atu atinji iha programa suade inan ho oan.
Nia hatutan, implementasaun programa saude inan ho oan durante ne’e la’o diak ona, maibe presiza hasa’e kobertura no kualidade atendimentu ne’ebe iha.
Iha parte seluk, Health Policy Advicer Organizasaun Mundial Saude (OMS) dotora Dolores Castello hateten tempu ona atu iha instrumentu avaliasaun foun ne’ebe kondis ho situasaun real Timor –Leste nian.
Nia dehan, instrumentu ne’ebe diak bele ajuda mos implementador programa no servidor saude sira atu hadia kualidade prestasaun servisu no kualidade atendimentu ba iha komunidade.
“Atu iha instrumentu ne’ebe diak hodi ajuda halo monitorizasaun ne’ebe diak ba iha faze kualidade, tanba ida ne’e sai hanesan elementu importante ida atu melhora kualidade atendimentu,” nia hateten
Nia hateten, objetivu importante ne’ebe hotu –hotu hakarak mak la’os atu fornese deit atendimentu saude ba komunidade sira no komunidade sira iha asesu ba atendimentu saude, maibe tenke asegura atendimentu ne’ebe fo ho kualidade.
Maske instrumentu hirak ne’e sei iha diskusaun, maibe nia dehan importante mak tenke define kualidade prestasaun servisu atendimentu saude ne’ebe Timor –Leste presiza.
