Ekipa husi Ministerio Edukasaun liu husi Diresaun Nasional Aksaun Sosial Eskolar hala’o seminar ida ho inan aman estudantes iha suku Da-ulu, posto administrativu Kailako, Suku Fahi Nehan, postu Same, Suku Hafsa iha posto Quelicai kona ba to’os eskolar no saude eskolar nian.
Diretor Nasional Aksaun Sosial Eskolar, Belchior Maria Barros hateten liu husi programa nasional KONSANTIL deside hala’o seminariu iha suku tolu ne’ebe konsidera vulneravel atu asesu ba iha aihan.
“Suku tolu ne’e mak ita haree katak vulneravel tebes atu asesu ba hahan, tanba ne’e mak ami halo treinamento ba sira oinsa kontribuisaun komunidade sira nian ba to’os eskola sira,” nia hateten, iha Dili.
Nia dehan, uluk governo tau ona orsamento ba iha eskola sira atu hola produtu lokal sira ne’ebe mak komunidade sira iha ba merenda eskolar, maibe ikus mai komunidade sira la preparado.
“Ida ne’e mak ami halo dezaminasaun informasaun ba sira, oinsa sira mos bele kontribuisaun ba ita nia programa merenda eskolar ne’e,” nia dehan.
Nia dehan, iha treinamento ne’e koalia liu oinsa sira bele halo to’os hodi kuda netik modo, atu nune’e bele fa’an fali ba eskola.
Treinamento ne’e partisipa husi Diretor Edukasaun Munisipio, xefe sukus, komunidade inklui joventude sira no sira antusiasmo tebes ho programa ne’e.
Entretanto Diretor Edukasaun Munisipio Bobonaro, Alcino Brito Joao hateten, objetivos husi to’os eskolar ne’e maka oinsa inan- aman sira bele serviso hamutuk ho Ministerio Edukasaun , Ministerio Agrikultura no Peskas atu kontribui ba programa merenda eskolar.
“To’os eskolar ne’e kria hanesan espasu de kantareiro, ikus mai nia volume ne’e bo’ot bele oferese fali ba merenda eskolar,” nia hateten.
Atu nune’e, inan aman sira bele implementa ida ne’e iha suku laran atu bele fo kontribuisaun ba eskola tanba suku ne’e dok husi postu Kailaku.
“Husi kontribuisaun ne’ebe mak inan aman sira halo, atu nune’e sir abele asesu ba merkado ne’e besik, selae sira bele mai to’o Kailako ida ne’e mos dok,” nia dehan.
Iha treinamento ne’e mos koalia konaba saude eskolar, oinsa kona ba saude higiene ambiental, pesoal, bee no mos saneamento.
