Eleitores 599, kompostu husi pasiente ho familia hamutuk 454, profesional saude nain 145 mak la tuir votasaun iha loron elisaun (12/05/2018), tanba kondisaun moras no hala’o knar profesional iha Ospital Nasional Guido Valadares (HNGV).
Pasiente Januario Sarmento, (35), husi Postu Administrativu Atauro Munisipio Dili sente triste tanba labele partisipa iha elisaun antesipada tinan ne’e (2018) tanba moras.
Nia dehan, nudar sidadaun hakarak ezerse nia direitu politiku iha loron elisaun nian, maibe tanba lei la fo dalan atu vota iha HNGV, entaun nia lakon votu.
“Hau sente triste tebes, tanba hau labele partisipa iha elisaun antesipada ida ne’e,” nia hateten ho mata been iha HNGV Bidau, Dili.
Nia dehan, nia tama baixa iha HNGV iha loron 9 fulan Maio, tanba hetan asidente kareta iha postu administrative Atauro.
Enkuantu, Familia pasiente Olinda da Costa Ximenes husi postu administrative Uato-Lari -Munisipio Viqueque, hateten kada elisaun ema hotu preokupa ho taxa partisipasaun sidadaun sira nian iha loron elisaun menus, maibe laiha mekanismu ida atu fasilita sidadaun sira hodi tuir votasaun iha loron elisaun.
“Lei ne’e ladiak, ba furutu partidu ne’ebe manan tenke halo mudansa no hadia sistema ida ne’e atu ema hotu bele vota,” nia hateten
Iha parte seluk, Mediku Jeral Alberto Guterres lamenta ho servisu kordenasaun STAE no HNGV nian, tanba sira nia lista pikete ba profesional saude sira iha, maibe sira nia naran laiha lista atu vota.
“Elisaun uluk ba, ami hatudu kartaun profesional deit ami bele vota, maibe agora ami labele vota, ne’e tanba sa,” nia husu.
Nia sujere, atu ba futuru sistema ida ne’e labele aplika iha ospital sira liu –liu HNGV, tanba servisu ospital nian iha movimentu liu –liu pasiente sira tama no alta inklui mos
Hatan ba kestaun ne’e, Diretor Jeral Sekretariado Tekniku Administrasaun Eleitoral (STAE), Acilino Manuel Branco hateten situasaun ida ne’e regula iha dekretu lei governu nian numeru 4/2018.
Nia dehan, tuir lei eleitoral votasaun ambulatorio sira hanesan HNGV, ospital referral sira, prizaun sira tenke submete lista naran loron 10 antes tama ba loron elisaun.
Nia hatutan, ba pasiente sira ne’ebe lista naran tama tiha mak alta, signifika sira tenke integra ba suku ida –ida atu vota no sira ne’ebe tama depois lista sumbete ona sei la vota.
“Prosesu elisaun intermus mekanismu tenke define iha lei no minimu iha dekretu governu, tanba ne’e esforsu atu garantia partisiapasaun ita preokupa, maibe atu responde ba preokupasaun sira ne’e tenke iha baze legal atu garantia, tanba ikus mai ita tenke justifika buat hotu kumpri lei,” nia hateten
Nia dehan, STAE hanesan orgaun tekniku sei la implementa kualker atividade no akontesementu ne’ebe ses husi lei.
