Diretor Saude Munisipio Ermera, Graciano da Cruz hateten difikuldade ne’ebe sira hasoru iha terenu mak laiha kombostivel atu fasilita profesional saude sira halo visita ba familia sira (domisiliario), tanba kompania la fornese ona kombostivel ba sira.
Alende ne’e, nia dehan sira mos iha limitasaun rekursu humanu atu hala’o programa saude nian iha baze, liu –liu visita domisiliario no saude na familia ne’ebe implementa hela iha teritorio tomak.
Nia dehan, maske ho limitasaun sira ne’e maibe ho motivasaun ne’ebe bo’ot profesional saude sira kontinua esforsu atu halo visita ba familia sira, fo edukasaun saude no atendimentu saude primaria.
“Iha parte balun ne’ebe kondisaun geografiku difisil tebes ba profesional saude sira atu visita no sira tenke la’o ain ou uza motor atu to’o ba komunidade sira,”nia hateten bainhira partisipa iha enkontru avaliasaun servisu visita domisiliario iha Kaikoli, Dili.
Nia hateten, moras ne’ebe profesional saude sira identifika barak mak moras la hada’et sira hanesan moras tensaun, moras mental, defisiente fiziku no seluk tan.
Nia informa, durante visita pasiente ne’ebe presiza atendimentu intensive sira halo referral ba iha sentru saude no presiza atendimentu ospitalar halo referral mai ospital nasional.
Tuir observasaun TDW durante diskusaun, preokupasaun ne’ebe hanesan mai mos husi servisu saude munisipio sira seluk inklui Rejiaun Administrativu Espesial Oe-Cusse Ambeno (RAEOA), tanba kompania labele ona fornese kombostivel ba sira.
Hatan ba preokupasaun ne’e, Ministru Saude Rui Maria de Araujo hateten rekonese difikuldade ida ne’e tanba kompania fornesedor kombostivel saude munisipio sira bele fornese deit gazoel, gasoline sira la fornese.
Nia hateten, ministerio sei buka atu responde ba difikuldade sira ne’e hodi fasilita servisu profesional saude sira nian iha baze, tanba vizita sira ne’e barak liu tenke uza motorizada.
“Ita funsiona ho orsamentu duadesimu, e iha implementasaun programa saude na familia bele haree hodi apoiu logistiku ida ne’e atu fasilita ekipa sira halo servisu iha teritorio tomak,” nia hateten
Kona ba rekursu humanus, nia husu ba saude munisipio sira atu involve voluntario sira hanesan Promotor Saude Familia (PSF) iha atividade visita sira ne’e.
Iha fulan Marsu (2018) liu ba, Ministerio da Saude lansa segundu visita integradu saude na familia iha teritorio tomak no tuir planu sei kompleta iha fulan Julho tinan ida ne’e.
