Polisia Komando Munisipiu Dili konsege prende kareta sia no motor 30 iha operasaun pasa revista ne’ebe hala’o iha area Tasi Tolu nian, iha semana kotuk, tanba kontra regras tranzito nian.
Segundo Komandante, Superintendente Asistente Polisia Munisipio Dili Euclides Belo hateten, operasaun ne’e ho intensaun atu evita publiku sira ne’ebe ba tuir kampanha lori sasan kroat inklui motor kanu resin, laiha xapa matrikula no laiha karta kondusaun.
Nia informa, ne’e regras husi Comisaun Nasional ba Elisaun nian, kombina ho polisia hodi implementa regulamento no dekreto lei ne’ebe mak ligado ba serviso tranzito rodaviaria nian, kontrola transporte sira ne’ebe mak laiha xapa matrikula , kanu resin, inkliu mos sasan kroat sira.
“Iha pasa revista ne’e, ami konsege prende motor hamutuk 30 no kareta sia, tanba xapa matrikula laiha, kanu resin no balun kontra regras,” Komandante Belo hateten, iha Dili.
Viaturas hirak ne’e, nia dehan polisia fo ona bilete infrasaun nian ba infratores hodi ba selu iha banku, balun selu ona e balun mos seidauk.
“Espera, katak seksaun tranzitu rodaviaria nian sei aprezenta ba komando kona ba hira mak selu ona multa no hira mak seidauk, atu nune’e ami bele halo koperasaun ba sira,” nia esperansa.
Nia informa, iha pasa revista ne’e polisia lahetan arma branka ruma ne’ebe mak motorista sira lori, ne’e signifika publiku kumpriende lei ona.
Entretanto komunidade Tasi Tolu, Elvis da Silva iha nia observasuan nota katak motorista balun kontinua uza motor kanu resin.
Nia dehan, sira ne’ebe mak baibain uza motor kanu resin ne’e maioria ne’e joven sira bainhira ba tuir kampanha iha munisipiu Liquisa no Ermera.
“Dala ruma, kalan ita toba sira uza motor kanu resin ne’e tama-sai halo barulho iha bairo laran,” nia dehan.
Tanba ne’e, nia husu ba Polisia atu kontrola li-liu ba joven sira ne’ebe mak utiliza motor kanu resin hodi halai tun-sa’e halo barulho iha Dili laran.
