Komandante Polisia Munisipiu Dili, Superintendente Xefe Pedro Belo hateten laiha toleransia ba membrus polisia ne’ebe involve iha partidus politiku.
Nia dehan, uluk kedan to’o agora sempre alerta ba membrus tomak katak tenke hala’o knar tuir lei ne’ebe iha.
“Ami sempre alerta ba ami nia membru tomak, katak kualker se deit mak viola lei ou viola kodigu estrada, prende kareta la haree ba partidu A ka B, se membru balun mak involve, laiha toleransia ba sira,” Komandante Belo hateten ho seriu, iha Dili.
Tanba, nia dehan lei bandu zero toleransia ba membru ne’ebe mak pratika ba iha politika, tanba ne’e mak Komando Munisipiu Dili sempre alerta ba ninia membru tomak hodi hala’o servisu tuir lei haruka.
“Ate agora, hau sedauk simu komplain ka keixa ruma hosi komunidade katak hau nia membru Munisipiu Dili A ka B involve iha partidu A no B,” nia hateten.
Signifika, katak Polisia Munisipiu Dili to’o iha eskuadra sira hotu komesa kompriende ona sira nia funsaun no dever hodi asegura komunidade hotu.
Entretanto Komunidade Izaias Ximenes hateten, polisia nia knar atu asegura seguransa ba komunidade hotu tantu partido politiku ne’ebe deit.
“Sira labele mete iha partido saida deit, sekuando sira involve iha partido ruma, signifika sira hala’o sira nia knar la independente ona,” nia hateten.
Nia espera, katak membru Polisia Nasional Timor-Leste (PNTL) sira sei la mete iha partido ruma, tenke hala’o serviso ho indenpendensia, la haree ba partido ka kor, halo seguransa ba ema hotu.
