Polisia kontinua halo operasaun pasa revista iha tempu kalan ba transporte sira ne’ebe halo movimentu iha sidade laran.
Komandante Poli-sia Munisipiu Dili, Superintendente Xefe Pedro Belo hateten husi pasa revista ne’ebe hala’o iha tempu kalan ne’e konsege prende kareta estadu hamutuk 10 resin, tanba uza liu oras servisu nian.
“Sira halo movimentu iha kalan liu ona oras, entaun ita prende kareta sanulu resin durante periodu kampanha nian,” Belo dehan.
Alende ne’e, nia hateten polisia mos konsege prende motor kanu resin lubuk ida durante kampanha tanba kontra kodigu estrada.
“Hau hanoin barak tebes, maibe to’o agora hau seidauk halo ninia rezumu total tanba sei kontinua halo pasa revista,” nia dehan.
Iha sorin seluk, nia dehan Polisia mos prende transporte publiku hamutuk 70 resin, balun selu ona multa, no seluk seidauk.
Entretanto Kondutor Mikrolet 05, Pedro de Jesus rekonese, katak nia sala tanba nia kontra regras ne’ebe mak polisia estabelese ona.
“Hau sala duni tanba hau la uza farda, ne’ebe hau pronto ba selu iha banku,” nia rekonese.
Nia dehan, kondutor sira ne’ebe mak kontra la uza farda kompleto, selu multa $40, sira ne’ebe mak uza faru deit selu $15.
Tanba ne’e, nia dehan ba oin nia sei la kontra regras tranzito nian.
