Sekretariadu Estadu Joventude e Trabalho (SEJT) hahu loke vaga lori kareta nian ba foinsa’e feto sira ne’ebe hakarak sai driver iha Australia.
Sekretariu Estadu Nivio Magalhães hateten agora vaga hahu loke ona e sira ne’ebe hakarak bele mai rejistu ba kandidatu foun e vaga ne’e ba feto deit.
Kompania husi Australia ne’e, nia dehan sira refere liu ba feto foinsa’e sira ho idade 21 to’o 45 atu sai driver iha Australia.
“Tenki iha esperiensia servisu area hortikultura, hatene lian Inglesh, fiziku no mentalidade saudavel, karakter diak no pronto tuir prosesu preparasaun hotu ou livre husi krime,” nia hateten, iha Kaikoli, Dili.
Ho programa ida ne’e, nia dehan SEJT hakarak promove feto foinsa’e sir abele sai driver iha nasaun seluk, la’os deit iha Australia maibe mos nasaun seluk bainhia sira presiza.
“Vaga ne’e presiza ema nain hira, ne’e seidauk detailhu e ami sei haree maibe presisa mak asegura sistema, sistema tenke justu, abertu,” nia hateten.
Iha parte seluk Diretor organizasaun Luta Hamutuk (LH), Jose Alves da Costa konsidera politika no programa ida ne’e diak tebes ba feto foinsa’e sira ne’ebe hakarak dezenvolve sira nia skil iha area ida ne’e.
“Maibe tenke sai driver ne’ebe lolos, tenke hatene atende kareta bainhira aat ruma, hatene hadia lalais atu bele augenta,” nia sujere.
Alende ne’e, nia dehan liu husi programa ida ne’e bele mos muda pensamentu publiku nian ne’ebe dezafia feto Timor katak labele lori kareta mesak.
“Ba kaer kareta iha nasaun seluk ne’e, hau la garantia familia sira husik sira nia oan feto ba kaer kareta iha nasaun seluk,” nia dezafia.
Maibe, nia dehan importante oinsa maka governu bele fasilita lina komunikasaun ne’ebe diak ho familia sira, nune’e labele mosu desintendementu.
“Hametin sira nia konfiansa, tanba ba servisu iha rai seluk sai driver iha ema nia nasaun ne’ebe mais dezenvolvidu, ne’e diak tebes,” nia hateten.
Entretantu foinsa’e Domingas da Silva hateten programa ida ne’e diak tebes, tanba liu husi ida ne’e bele promove feto foinsa’e Timor oan iha vida driver nian.
“Hau orgulho teb-tebes ba sekretario estado nia programa ida ne’e, atu nune’e hatudu ba mundu katak feto foinsae Timor mos bele sai driver iha ema nia rain,” nia orgulho. n
