Eleitores feto esperansa katak partidu ne’ebe hetan fiar husi povu iha elisaun agora, tenke forma governu ne’ebe diak atu mantein estabilidade no kontinua dezenvovlimentu ne’ebe la’o ona hodi hadia povu nia moris.
Xefe Suku Soba, Postu Administrativu Laga Munisipio Baucau Francisca Monica hateten dezenvolvimentu iha rai laran la’o ona, maibe parte balun sei hela iha kotuk tanba ne’e governu foun ida ne’e tenke iha planu ida ne’ebe diak atu halo dezenvolvimentu iha teritorio tomak.
Nia dehan, dezenvolvimentu infrastruktura baziku presiza hare tanba maioria iha fatin hotu estrada aat laiha asesu ba estrada, laiha asesu ba eletrisidade no fasilidade saude.
“Hau hein katak governu foun mai presiza mos tau matan ba iha boa governasaun ne’ebe diak,” nia esperansa.
Nia hateten, governu foun ida ne’e mos tenke kria kondisaun no fo oportunidade ba feto rural sira partisipa iha dezenvolvimentu ekonomia Timor –Leste nian, tanba feto barak iha kreatividade no kapasidade intelektual, maibe laiha kbi’it atu dezenvolve aan.
Alende ne’e, nia mos husu governu foun mai atu halo sosializasaun rutina ba publiku liu –liu familia foun sira kona ba lei kontra violensia domestika, atu ema hotu bele intende lei ne’e ho diak.
Entretantu, Prezidente Asosiasaun Feto Munisipio Aileu Cristinha Conçeicão hateten kuaze partidu politiku hotu iha komitmentu atu promove igualidade jeneru, liu –liu hakbi’it no empoderamentu ba feto.
Nia dehan, iha kampanha partidu sira kompromete atu fo kreditu ba feto sira ho funan ne’ebe ki’ik hodi hahu negosio, apoia sustentabilidade ekonomia familia nian, fornese bee moos iha teritorio tomak atu feto sira la presiza la’o do’ok kru bee.
Alende ne’e, nia dehan iha partidu balun mos hato’o komitmentu atu hadia sistema bolsa da mae no hasa’e subsidio bolsa de mae atu asegura inan sira tau matan ba oan sira nia estudu.
“Ita espera, katak sira nia kompromisio sira ne’ebe hato’o iha kampanha sei tau iha pratika, tanba problema sira ne’e mak feto sira infrenta,” nia hateten
Nia hateten, governu anterior programa sira ne’e implementa ona, maibe presiza intensifika liu tan antesaun hodi fo benefisio ba feto sira.
Iha oportunidade ne’e, nia apela ba feto sira hotu atu labele sente dezkontente ho atividade kampanha sira hodi la ba vota, maibe tenke hakbesik aan ba sentru votasaun atu fo votus ba partidu sira ne’ebe sira eskoilha tuir konsiensia.
Iha parte seluk, Marilia Alves espera elisaun antisipada ida ne’e la’o ho livre, demokratiku atu ema hotu bele sente seguru hodi partisipa iha elisaun.
“Husu ba partidu politiku sira hotu atu bele ho espiritu nasionalismu no fuan bo’ot simu rezultado saida deit,” nia husu.
Nia hateten, kestaun importante ne’ebe partidu politiku sira tenke garantia mak asegura estabilidade, atu ema hotu bele sente hakmatek no seguru hodi hala’o atividade lor-loron nian ba sustenta sira nia moris.
