Mediku Jeral Piter Brando Li, hateten inan isin rua ho kondisaun anemia fo risku bo’ot tebes ba sira, inan bele hetan abortus no bebe moris ho kondisaun fiziku ki’ik tanba ran menus no labele lori oksigeniu ba bebe ho diak.
Tanba ne’e, nia dehan iha Sentru Saude Vera Cruz sira fo aimoruk Sulfato Ferroso (SF) no Acido Folico (FA) ba inan isin rua hotu, evita hodi labele hetan moras anemia.
“Ba inan isin rua sira ne’ebe halo konsulta maske la hetan anemia, ami sempre fo aimoruk SF no FA atu prevene anemia, maibe dala barak inan isin rua sira lakohi hemu aimoruk rua ne’e,” nia hateten iha servisu fatin Kaikoli, Dili.
Alende ne’e, nia dehan sira mos fo akonselhamentu ba inan isin rua sira atu hemu aimoruk no konsumu aihan ne’ebe kontein ho feru hanesan na’an karau, na’an aten, modo tahan sira ne’ebe matak liu –liu bayam no borkoli.
Nia informa, durante ne’e sira mos detekta inan isin rua sira ne’ebe ho kondisaun anemia, maibe ladun barak.
Moras Anemia, mak ran mean menus ne’ebe halo ema nia oin kamutis, halo ema forsa laiha atu halo servisu no bele kauza ba moras seluk.
Portantu, dadus Ministerio da Saude (MdS) nian iha tinan 2013 hatudu, katak inan 39.5% mak sofre moras anemia.
Iha parte seluk, Jerente Programa Saude Inan ho Oan husi Fundasaun Alola, Macu Guterres hateten kontribuisaun ne’ebe sira halo mak liu husi grupo suporta inan ho oan no suku hadomi inan ho oan iha nivel suku, hodi fo akonselhamentu ba inan sira atu fo importansia ba iha kuidadu ante natais (KAN).
“Ami halo akonselhamentu no edukasaun ba inan isin rua sira kona ba kuidadu ante natais, halo visita regular ba fasilidade saude ne’ebe iha no konsumu hahan local sira ne’ebe fo nutrisaun diak ba sira no bebe ne’ebe iha isin,” nia hateten
Alende ne’e, sira mos servisu hamutuk ho fasilidade saude local sira atu halo planu partu ne’ebe diak, atu inan sira bele hetan partu seguru no moos.
Nia hateten, sira mos halo edukasaun ba inan sira kona ba risku perigu sira ne’ebe akontese durante isin rua no depois partu.
Nia informa, ho esforsu hotu ne’ebe parte ministerio ho parseiru sira halo hatudu rezultado signifikante balun, hanesan konsege redus mortalidade inan no infantile, maibe malnutrisaun nafatin sai problema.
