Primeiru Ministru (PM) Timor –Leste, Rui Maria de Araújo deklara ofisialmente ba publiku katak fasilidade saude hotu-hotu iha teritorio tomak uza ona sistema registu saude elektronika (digital) hodi fo konsulta ba pasiente sira.
Nia dehan, fasilidade saude sira bele ativamente uza registu saude elektronika ne’e atu fo konsulta ba komunidade sira, tanba kuaze 88% ona total habitantes mak registadu iha sistema.
Nia rekonese, katak iha fatin balun fasilidade (komputador) la barak, maibe iha tempu badak Ministerio Saude sei ajuda tan komputador hodi haforsa servisu ida ne’e diak liu tan.
“Instrumentu teknologia ida ne’e atu fasilita ita fo atensaun diak liu tan ba ita nia populasaun,” nia hateten hafoin inagura sistema digital, iha Dili Convention Center.
Maibe, nia husu keta haluhan kuidadus saude primaria (sentru saude, postu saude), ita fo atensaun nafatin.
Maske nune’e, nia dehan sei iha persepsaun negativu barak kona ba prestasaun servisu kuidadu saude iha Timor-Leste, maibe indikasaun saude publiku hatudu saude iha progresu diak.
Nia dehan, dadus sira husi rezultado visita uma kain ajuda jestor saude sira iha munisipio atu halo planeamentu ne’ebe komprensivu hodi halo intervensaun.
Nia informa, objetivu husi vizita saude da familia mak atu indetifika grupo importantes hat hanesan grupo primeiru mak saudavel, risku ba moras, moras no defisientes.
Iha loron 22 tinan 2015, governu deside objetivu importante ida atu lori saude ba uma kain ida –idak liu husi programa saude ba familia, tanba komunidade liu –liu iha area remotas la asesu ba servisu saude.
Entaun, iha tinan 2016 governu deside loron 22 sai hanesan loron nasional saude iha Timor –Leste, tanba iha loron ne’e governu lansa programa saude ba familia iha Timor-Leste ne’ebe hetan inspirasaun husi modelu
kuidadus saude primario Cuba ho prosesu bolu dizpensarizasaun.
Enkuantu, Prezidente Autoridade munisipio Ermera Jose Martino do Santos Soares hateten programa saude ba familia ne’e signifikativu tebes, tanba professional saude sira mak buka tuir komunidade iha sukus no aldeias.
“Ita nia komunidade ne’e pasivu liu, ezemplu sira moras hela maibe sira dehan diak hela, hein to’o grave mak foin halai ba mediku sira,” nia hateten.
Nia dehan, autoridade local munisipio Ermera husi prezidente autoridade to’o lider komunitaria sira fo apoiu maximu ba iha programa ida ne’e, tanba lori impaktu ne’ebe positive ba saude komunidade nian.
Tanba ne’e, nia husu ba governu foun mai tenke kontinua no suporta diak liu tan programa ida ne’e tanba programa ne’e bele kontribui atinji metas SDG nian, liu –liu saude no moris diak povu nian.
Iha parte seluk Vise Ministra Saude Ana Isabel Soares, hateten tema ba selebrasaun loron nasional saude ba dahuluk nian mak ‘lori saude ba uma kain ida –idak no lori povu ba moris diak’.
“Rezultado hatudu, maioria populasaun Timor –Leste hela iha kondisaun ne’ebe risku hetan moras iha sira nia moris,” nia hateten.
Nia hateten, programa saude ba familia ne’e mak atu asegura ema hotu hetan asistensia saude husi professional saude sira no atinji prinsipio international hirak hanesan Universal Health Coverage, katak la husik ema ida iha
kotuk.
