Durante halo operasaun iha tempu kampanha eleitoral ba elisaun parlamentar nian, Polisia Tranzito munisipiu Dili konsege prende motorizadas 20 ne’ebe uza kanu resin.
Segundo Komandante Polisia Munisipiu Dili, Euclides Belo hateten lei bandu labele uza motor ho kanu resin.
“Ami foti ona motor uza kanu resin hamutuk 20 no oras ne’e dadaun ami mos monta ona estrutura konselho polisia komunitario iha suku no aldeia hotu atu bele identifika nafatin ema ne’ebe sei uza kanu resin motor tanba bele prejudika ema seluk,” nia hateten, iha Kaikoli, Dili.
Tanba ne’e, nia apela ba motoristas ne’ebe gosta uza motor ho kanu resin atu tau aas interese komun nian, tenke kria ambiente ne’ebe hakmatek iha komunidade nia le’et no kria estabilidade.
Enkuantu tuir estudante Estalino Gomes hateten motor kanu resin bele fo impaktu ba ema seluk, liu-liu bainhira sira deskansa iha meudia no kalan nian.
“Dala barak halo barulhu ba komunidade sira ne’ebe hela iha estrada ninin, tan ne’e husu ba polisia atu tau atensaun maximu ba ema sira ne’e,” nia sujere.
Nia mos sujere, ba komunidade balun ne’ebe uza motor kanu resin se bele prevene tiha povu no rai ida ne’e presiza moris iha ambiente ne’ebe hakmatek, paz no estabilidade nia laran.
