Primeiru Ministru (PM), Rui Maria de Araújo husu Komisaun Funsaun Publiku (KFP) atu mantein prinsipio meritu iha prosesu rekrutamentu ba funsionario publiku foun.
Nia rekonese, prosesu administrasaun publiku sei iha defisensia balun ne’ebe halao servisu la la’o ba oin, e governu esforsu atu hadia liu husi pratika prinsipio meritu iha administrasaun publika.
Nia hatutan, partidu politiku ida bele iha politika diak maibe kuandu administrasaun publiku la funsiona ho diak sei lahetan susesu.
“Administrasaun publika mak ponte entre politika no realidade, politika sei la sai realidade hodi fo benefisiu ba povu bainhira administrasaun publiku la halo servisu tuir knar lolos no la jere implementasaun politika ho diak,” nia hateten iha selebrasaun loron nasional ba funsionario publiku, iha Sentru Convensaun Dili.
Tanba ne’e, nia husu ba politiku nain sira ne’ebe sei hetan fiar husi povu ba ukun tinan lima mai atu labele partidariza servisu administrasaun publika atu dezenvolvimentu Timor –Leste avansa ba oin.
Nia husu mos, iha linha ministerio sira atu labele implementa programas, projetu no nomeasaun ema tuir kor politiku, sela’e estado ida ne’e sei la ba oin.
Iha okaziaun ne’e, xefe governu ne’e mos husu ba funsionario publiku sira atu banati tuir Santo Thomas More ne’ebe hanesan mos funsionario publiku no advogado ida brani tebes, hateten la’e ba ukun nain ne’ebe hakarak halo desizaun la tuir lei (viola lei), ne’ebe ikus mai ema oho nia.
“Funsionario publiku sira, imi tenke iha korajen, hateten la’e bainhira politiku sira hakarak halo sasan tuir sira nia hakarak,” nia apela.
Entretantu, Prezidente KFP Faustino Cardoso hateten loron nasional ba funsionario publiku ne’ebe monu iha dia 15 de Julho sai hanesan oportunidade ne’ebe oportunu tebes ba funsionario publiku hotu no funsaun publika atu halo reflesaun klean ba servisu atendimentu publiku ne’ebe halo ona ba povu no nasaun ida ne’e.
“Oportunidade diak ida ba ita hotu nudar servidor publiku atu halo reflesaun klean ba dezempenho no servisu ne’ebe ita hala’o ona iha tinan kotuk no buka renova ita nia vontade no kompromisio atu servisu ho diak no responsabilidade ba povu no rai ida ne’e,” nia hateten
Nia informa, atividade principal ba tinan ida ne’e mak jornada la’o tuir ain fatin saudozo prezidente Nicolau Lobato, ho objetivu haklean konesementu servidor publiku kona ba istoria atu sira bele sensibiliza no motiva aan hodi hala’o servisu ho responsabilidade, dedikasaudn no sakrifisio tomak ne’ebe saudozu sira husik hela ba rai ida ne’e.
